Kuri uyu wa kabiri tariki 18 Ukwakira 2022, nibwo ikipe y'igihugu Amavubi y'abatarengeje imyaka 23 yasuye umukecuru Mukanemeye Madeleine, uzwiho gushyigikira ikipe ya Mukura ndetse n'Amavubi.
Uyu mukecuru usanzwe ubarizwa mu Karere ka Huye, ni umufana mukuru wa Mukura ukunze kugaragara ku mikino iyi kipe iba yakinnye, ndetse n'imikino ikipe z'igihugu cy'u Rwanda zirimo kwakirira i Huye.
Abakinnyi, abatoza ndetse n'abayoboye ikipe y'igihugu Amavubi y'abatarengeje imyaka 23 berekeje mu rugo rwo kwa Mukanemeye Madeleine, bamuha umwenda w'ikipe y'igihugu Amavubi, ikote ririnda imvura, ndetse n'ibahasha.
Nk’uko tubikesha imbuga nkoranyambaga za FERWAFA, Mukanemeye Madeleine nawe yasazwe n'ibyishimo, yizeza ikipe y'igihugu kuzaza kuyifana ubwo izaba ikina ma Mali.
Amavubi y'abatarengeje imyaka 23 amaze iminsi igera kuri 3 mu Karere ka Huye aho bari mu myitozo ikomeye, bitegura umukino ubanza wo gushaka tike y'igikombe cy'Afurika mu batarengeje imyaka 23, kizabera muri Maroc aho kuri uyu wa gatandatu bakira Mali i Huye.
Mukanemeye abwira Nyarugabo Moise ati" Yezu akuzwe"
Mukanemeye abwira Niyigena Clement ati" Gira abana"
Mukanemeye Madeleine yahawe umwenda w'ikipe y'igihugu Amavubi uriho nimero 26
Mukanemeye ufana Mukura victory sports byabuze akagero yahawe ikote ry'imbeho ry'Amavubi
Nyuma yahawe ibahasha
Abakinnyi bafashe ifoto y'urwibutso muri rusange imbere y'urugo rwa mukanemeye
Mukanemeye ati" ndaberewe cyane rwose ku wa gatandatu nzaza nabukereye"
Ibyishimo byari byose imbere y'abakinnyi b'ikipe y'igihugu Amavubi