Ye yari ateganyijwe kuririmba ku kibuga cya Gazprom Arena, i
St Petersburg, ku matariki ya 10 na 11 Ukwakira 2026. Ibitaramo byombi byari
byamaze kugurisha amatike yose, mbere y’uko abategura babitangaza ko
bitakibaye.
Ikigo Say Agency cyari gishinzwe gutegura ibi bitaramo,
cyatangaje ko Ye atakibashije kuririmbira muri St Petersburg kuri ayo matariki
yari yarateganyijwe.
Mu butumwa bwashyizwe kuri Telegram ku wa Kane, iki kigo
cyasobanuye ko cyababajwe no gutangaza ko ibi bitaramo bitakibaye, ndetse
gisaba abafite amatike gutegereza amabwiriza ajyanye no gusubizwa amafaranga
yabo.
Abategura batangaje ko gusubiza amafaranga y’amatike
bizatangira ku wa 12 Ukwakira 2026, bakavuga ko amakuru arambuye ku buryo bwo
kuyasubizwa azatangazwa nyuma.
Kuva Ye yatangaza gahunda yo gukorera ibitaramo mu Burusiya,
iyi gahunda yakomeje kuvugwaho byinshi ndetse igahura n’impinduka zitandukanye.
Gazprom Arena yari yabanje gutangaza ibijyanye n’ibi
bitaramo, ndetse ishimangira ubwamamare bwa Ye mu muziki. Nyuma, muri Kanama
2026, iki kibuga cyatangaje ko kitigeze kigirana amasezerano yo guha abategura
ibi bitaramo uburenganzira bwo kugikoresha.
Gazprom Arena yahise ishimangira ko itari ishinzwe ibyo
bitaramo, ndetse ivuga ko yari yakiriye ibirego by’abantu batandukanye
batishimiye gahunda yo kwakira Ye.
Nubwo ibi byari byateje urujijo, abategura bakomeje kuvuga
ko ibitaramo bizaba, kugeza ubwo ku wa Kane batangazaga ku mugaragaro ko
bitakibaye.
Guhagarikwa kw’ibi bitaramo bibaye mu gihe Ye amaze imyaka
ari mu mpaka zikomeye kubera amagambo n’ibikorwa bye byagiye bifatwa
nk’ibibasira Abayahudi ndetse no gushimagiza Adolf Hitler.
Umuvugizi wa Minisiteri y’Ububanyi n’Amahanga y’u Burusiya,
Maria Zakharova, yari yaravuze ko ibitaramo bya Ye muri icyo gihugu bidakwiye
kuba, ashingiye ku byo yavuze n’ibikorwa bye byagiye bishimangira gushimagiza
Hitler.
Mu mwaka ushize, Ye yanashyize ku isoko umupira uriho
ikimenyetso cya Nazi, ndetse anasohora indirimbo yise ‘Heil Hitler’, ibintu
byakomeje kongera uburemere bw’impaka zimukikije.
Muri Mutarama 2026, Ye yasohoye ubutumwa bwo gusaba imbabazi
ku bantu yababaje, abushyira no mu kinyamakuru Wall Street Journal. Muri ubwo
butumwa, yavuze ko atari Umu-Nazi cyangwa umuntu wanga Abayahudi, ahubwo ko
akunda Abayahudi.
Yanasobanuye ko yari yaranyuze mu bihe bikomeye
by’imyitwarire idasanzwe, avuga ko indwara ya bipolar yari yaragize uruhare mu
gihe yamaze amezi hafi ane arangwa n’imyitwarire ya manic, paranoia n’ibindi
bibazo by’imitekerereze.
Gahunda yo gukorera ibitaramo mu Burusiya yari ikurikiye
izindi mpinduka Ye yahuye na zo mu bihugu bitandukanye.
Muri Mata 2026, igitaramo cye mu Bufaransa cyarasubitswe
nyuma y’uko atabonye Visa yo kujya mu Bwongereza. Ibi byanagize uruhare mu
iseswa ry’ibitaramo yari ateganyijwe gukorera mu iserukiramuco rya Wireless i
Londres.
Muri Nyakanga 2026, Ye yari kandi ateganyijwe kuririmba mu
iserukiramuco rya Pulse of Gaia, ryagombaga kubera i Reggio Emilia mu
Butaliyani. Icyo gitaramo cyahagaritswe n’ubuyobozi bw’ako gace nyuma y’uko
abaturage b’Abayahudi bagaragaje impungenge.
Nubwo ibi bibazo byagiye bigaragara hirya no hino, Ye
yakomeje kubona abafana bitabira ibitaramo bye igihe bibashije kuba.
Muri Mata 2026, yakoze igitaramo gikomeye i Los Angeles,
cyari icya mbere akoreye muri Leta Zunze Ubumwe za Amerika mu gihe kirenga
imyaka itanu. Yagiye kandi akorera ibitaramo imbere y’imbaga nyinshi muri
Turikiya, u Buholandi, Georgia, Albania, Portugal na Kazakhstan.
Gukorera igitaramo mu Burusiya byari gutuma Ye akurikira
abandi bahanzi mpuzamahanga bagiye kuhakorera ibitaramo mu myaka yashize,
barimo Paul Oakenfold, DaBaby, Jason Derulo na Akon.
Icyakora, gahunda ye yaje mu gihe u Burusiya bukomeje
gufatirwa ibihano bitandukanye n’ibihugu by’amahanga, nyuma y’uko bwateye
Ukraine mu 2022.
Umudepite w’Uburusiya witwa Nikolay Novichkov na we yari
yasabye ko Ye akorwaho iperereza kubera amagambo ye yo gushimagiza Hitler.
Yanavuze ko ibitaramo bye bitagomba kuba atabanje gutangaza ko ashyigikiye u
Burusiya n’ibikorwa byabwo muri Ukraine.
Nubwo hari impaka nyinshi zimukikije, Ye yakomeje gukora
umuziki no gutegura ibitaramo.
Ibi bitaramo byo mu Burusiya byari mu bikorwa bye byo
kwamamaza album ye ya 12 yise Bully, yasohotse muri Werurwe 2026.
Abafana bari bamaze kugura amatike y’ibitaramo by’i St
Petersburg bagomba gutegereza amabwiriza y’ababiteguye ajyanye no gusubizwa
amafaranga.
Kugeza ubu, Say Agency yatangaje ko ibitaramo byo ku wa 10
n’u wa 11 Ukwakira bitakibaye, ariko ivuga ko izakomeza gutanga amakuru ajyanye
n’umushinga n’izindi gahunda za Ye mu gihe kiri imbere.
Ibitaramo bibiri Kanye West yari ateganyijwe gukorera i St
Petersburg mu Burusiya ku wa 10 n’uwa 11 Ukwakira 2026, byari byaramaze
kugurisha amatike yose byahagaritswe