Mu mateka yose ya WAFCON, ibihugu bitatu gusa ni byo byigeze byegukana igikombe: Nigeria, Guinea Equatorial na Afurika y’Epfo. Nubwo ibihugu byinshi byagiye byitabira iri rushanwa kandi urwego rwa ruhago y’abagore rukomeje kuzamuka, ibi bihugu bitatu ni byo byanditse amateka akomeye kurusha ibindi.
Nigeria: Igihangange cya mbere muri WAFCON
Muri byo bihugu bitatu byabashije kwegukana iki gikombe , Nigeria ni yo yiganje cyane, kuko ari cyo gihugu gifite ibikombe byinshi mu mateka ya WAFCON, kikaba kimaze imyaka myinshi gifatwa nk’ikigugu cya ruhago y’abagore muri Afurika.
Mu 1998, ubwo hatangirwaga ku nshuro ya mbere igikombe cya Afurika cy’abagore, Nigeria ni yo yegukanye igikombe cya mbere, itangira urugendo rwo kubaka ubwami bumaze imyaka irenga makumyabiri.
Ikipe ya Nigeria y’abagore, izwi nka Super Falcons, yahise iba ikipe igoye gutsinda ku mugabane wa Afurika. Mu myaka yakurikiyeho, Nigeria yegukanye ibikombe byinshi, ndetse igira n’igihe yiganjemo iri rushanwa mu buryo budasanzwe.
Mu bihe bitandukanye, Super Falcons yagiye yegukana ibikombe byikurikirana, bigaragaza ubuyobozi bwayo muri ruhago y’abagore. Ubu ifite ibikombe icumi bya Afurika, bikaba ari byo byinshi kurusha ibindi bihugu byose.
Ni iki cyatumye Nigeria iba indahangarwa?. Hari impamvu nyinshi zatumye Nigeria iguma ku rwego rwo hejuru muri WAFCON.
Gushyira imbere impano z’abakobwa bakiri bato
Nigeria imaze imyaka myinshi yubaka urwego rwo gushaka no guteza imbere impano nshya. Abakobwa benshi batangira gukina umupira bakiri bato, bagakura banyura mu makipe yo mu gihugu mbere yo kugera ku rwego mpuzamahanga. Ibyo byatumye igihugu gihorana abakinnyi bafite ubushobozi bwo gusimbura abagiye mu kiruhuko.
Abakinnyi bageze ku rwego mpuzamahanga
Nigeria yabyaye bamwe mu bakinnyi bakomeye muri ruhago y’abagore ku isi. Abakinnyi nka Asisat Oshoala bagize uruhare rukomeye mu gukomeza kumenyekanisha igihugu no kugaragaza ko Afurika ishobora gutanga impano zihangana ku rwego rwo hejuru.
Umuco wo gutsinda
Ikindi cyaranze Super Falcons ni imitekerereze yo guhora ishaka gutsinda. Mu myaka myinshi, Nigeria yabaye ikipe abandi bihugu byo muri Afurika byifuzaga gutsinda, kubera amateka yayo n’ubunararibonye ifite.
Guinea Equatorial: Igihugu gito cyanditse amateka akomeye
Nubwo Guinea Equatorial itazwi cyane mu ruhago mpuzamahanga, cyane cyane mu bagabo, iki gihugu cyabashije gukora amateka akomeye muri ruhago y’abagore.
Guinea Equatorial yatunguye benshi ubwo yatwaraga WAFCON inshuro ebyiri, igaragaza ko ubunini bw’igihugu cyangwa amateka yacyo mu mupira w’amaguru atari byo byonyine bigena intsinzi. Intsinzi zayo zatumye kiba kimwe mu bihugu bitatu byonyine byigeze bitwara igikombe cya Afurika cy’abagore.
Afurika y’Epfo: Umuhate watanze umusaruro
Nyuma y’imyaka myinshi ihatana, Afurika y’Epfo yaje kwandika amateka mu 2022 ubwo yatwaraga igikombe cya WAFCON ku nshuro ya mbere.
Ikipe ya Banyana Banyana yari imaze imyaka myinshi igera hafi ku ntsinzi ariko ikabura igikombe, kugeza ubwo yaje kugitsinda ikerekana ko impinduka mu ishoramari no guteza imbere ruhago y’abagore zatangiye gutanga umusaruro. Intsinzi ya Afurika y’Epfo yatumye yinjira mu mateka nk’igihugu cya gatatu cyegukanye iri rushanwa.
Ejo hazaza ha WAFCON
Nubwo kugeza ubu amateka ya WAFCON yanditswe cyane na Nigeria, Guinea Equatorial na Afurika y’Epfo, urwego rwa ruhago y’abagore muri Afurika rukomeje kwaguka.
Ibihugu nka Maroc, Zambia, Malawi,Ghana n’ibindi biri kongera imbaraga mu guteza imbere amakipe y’abagore, bikaba bishobora kuzahindura imiterere y’iri rushanwa mu myaka iri imbere.
Ariko nyuma y’imyaka igera kuri 28 y’amateka, ikintu kidashidikanywaho ni uko WAFCON ifite amateka yanditswe n’ibihugu bitatu gusa, kandi Nigeria ikaba ari yo yubakiye ku nkingi zikomeye ubwami bw’igihe kirekire muri ruhago y’abagore muri Afurika.