Muri iyi shampiyona yose hakinnwe imikino 306, hinjizwa ibitego 654, bingana n’impuzandengo y’ibitego 2.14 kuri buri mukino. Ni umubare uri hejuru ugereranyije n’uwagaragaye mu myaka yashize, bigaragaza ko amakipe yarushijeho kwitwara neza mu busatirizi.
Ikipe ya Al Hilal Omdurman yegukanye igikombe cya shampiyona, inaba iya mbere mu gutsinda ibitego byinshi. Mu mikino 34 yakinnye, yatsinze ibitego 74, ibintu byayifashije kugera ku gikombe ndetse no kwerekana ubukana bwayo imbere y’izamu.
Ku rundi ruhande, Police FC ni yo yagaragaje ubwugarizi bukomeye kurusha andi makipe. Nubwo yasoreje ku mwanya wa gatandatu n’amanota 52, yinjijwe ibitego 19 gusa mu mikino yose, iba ikipe yatsinzwe ibitego bike muri shampiyona.
Imibare yerekana kandi ko amakipe yose hamwe yakusanyije amanota 822 muri shampiyona, umubare uri hejuru cyane ugereranyije n’amanota 655 yabonetse muri BK Pro League 2024/25. Ibi ahanini byatewe no kwiyongera kw’amakipe n’imikino yakinnwe.
Iyo hakuwemo ibitego byinjijwe n’amakipe yo muri Sudani, ariyo Al Hilal Omdurman na Al Merrikh, BK Pro League 2025/26 iracyaruta iya 2024/25 kuko habonetse ibitego birenga 40 ugereranyije n’umwaka ushize.
Muri rusange, BK Pro League 2025/26 yabaye imwe mu shampiyona zasize imibare ikomeye, ihatana rikomeye ndetse n’umusaruro mwiza w’ibitego, ibintu byatumye iba umwaka udasanzwe mu mateka ya ruhago y’u Rwanda.
