Amarangamutima ya Niyongira Patience wafashije Police FC kwegukana igikombe cy’Intwari cya 2026 akuramo penariti-VIDEO

Ku Cyumweru tariki ya 01 Gashyantare 2026 ni bwo ikipe ya Police FC yahuye na APR FC ku mukino wa nyuma w’igikombe cy’Intwari cya 2026 muri Stade Amahoro. Byarangiye Police Fc ariyo yegukanye iki gikombe nyuma yo gutsinda penariti 7 kuri 6.

Iyi kipe ariko yabifashijwemo n’umunyezamu Niyongira Patience wakuyemo penariti eshatu nyuma yo kujya mu kibuga asimbuye hagiye guterwa izi penariti.

Uyu munyezamu yavuze ko kugira ngo umutoza ajye kumushyiramo yari amwizeye ndetse ko yagombaga gukora uko ashoboye akaba intwari nawe. Ati: ”Kugira ngo umutoza agushyiremo ni uko aba akwizeye atakwizeye ntabwo yagushyiramo. Turi ku munsi w’Intwari, turi Police FC murabizi nanjye nagombaga kugerageza nkatera ikirenge mu cy'abatubereye Intwari “.

Yavuze ko gutsinda APR FC aba ari inzozi za buri wese. Ati: ”Gutsinda APR FC ni ibintu byiza cyane kuko ni ikipe nkuru, ni ikipe twubaha. Kuyitsinda ni inzozi za buri wese kuba tubigezeho turishimye cyane”.

Niyongira Patience yavuze ko nubwo begukanye iki gikombe ariko nta kwirara bagomba gutegura umukino ku mukino bityo n’ibindi bikombe bakaba babitwara.

Ati: ”Ntakwirara tugomba gutegura umukino ku mukino tugakomeza twiteguye byose birashoboka ko twabitwara. Tuzabitwara nidukomeza kwitwara neza”. 

Yavuze ko abanye neza n’umunyezamu usanzwe ari uwa mbere wa Police Fc, Rukundo Onesme. Ati: ”Njyewe mbanye neza na Onesme nta kibazo uko mba mwizeye nawe ndabizi ko aba anyizeye”.