Iyi filime yubakiye ku buzima
bw’umugabo n’umugore babana mu rukundo rukomeye, nubwo imibereho yabo iba igoye
ku rwego rwo kubura n’ibyangombwa by’ibanze. Nta mutungo bafite, amadeni
yarabarenze, ariko urukundo rwabo rukomeza kuba inkingi ibafasha kwihanganira
ibihe bikomeye.
Kethia akina ari umugore ukunda
umugabo we Dominic by’ukuri, akemera kubana na we mu bukene bukabije no mu
buzima bwuzuyemo ibigeragezo. Nubwo ubuzima bubakomera, ntiyemera ko amafaranga
cyangwa ibindi bibazo bisenya urugo rwabo.
Dominic we aba ari umugabo
uharanira ko urugo rwe rubaho, agakora akazi kose abonye kugira ngo abone icyo
ashyira ku meza. Akora ubuyede n’indi mirimo itandukanye, ariko ibyo yinjiza
ntibihagije ku buryo amadeni akomeza kubiyongera.
Mu bibazo bibugarije harimo umwenda
w’ubukode bw’inzu uba ugeze ku mezi atanu, ibintu bituma nyirinzu, ukinwa na
Dusengimana Jean Enoch, ahora abasaba kwishyura.
Gusa ibyo ntibigarukira aho kuko
uyu nyirinzu atangira no gukururirwa n’ubwiza bwa Kethia, akamushyiraho igitutu
no kugerageza kumwiyegereza mu buryo bushobora gushyira urugo rwabo mu kaga.
Aho ni ho inkuru itangira gufata
indi ntera, kuko Kethia aba asabwa guhitamo hagati y’ibishuko bishobora
gukemura ibibazo by’amafaranga n’urukundo nyarwo afitiye umugabo we. Ni
urugendo rugaragaza ko rimwe na rimwe ubukene bushobora kugerageza urukundo,
ariko ntibube impamvu yo kurusenya.
‘Amahina y'Ikinyoma’ ifatwa nk’imwe
muri filime zizibanda ku buzima busanzwe bwa benshi, igaragaza uko abantu
bashobora guhangana n’ubukene, amadeni n’ibigeragezo bitandukanye, mu gihe
urukundo nyakuri rwo rukomeza kuba urumuri rubayobora.
Abakinnyi bamaze gutangazwa
bazagaragara muri iyi filime ni Isezerano Dominic, Uwase Kethia na Dusengimana
Jean Enoch, mu gihe hategerejwe kumenyekana abandi bazifatanya na bo muri uru
rukurikirane rushya.
Kethia na Dominic bahuriye muri
filime y'uruhererekane ya mbere yitwa ‘Amahina y’Ikinyoma’
Kethia na Dominic babana nk’umugabo n’umugore ariko bugarijwe n’ubukene
KANDA HANO UREBE IBICE BYA FILIME ‘AMAHINAY’IKINYOMA’