Ally Soudy yahinduye imiterere y’igitaramo cye i Kigali ku murongo mushya w’imyidagaduro

Mu myaka ishize, Ally Soudy yari amaze kumenyekana mu gutegura igitaramo ‘Ally Soudy & Friends Live Show’, cyahuzaga abahanzi, ibyamamare n’abakora imyidagaduro mu buryo bwihariye.

Icyo gitaramo giheruka kubera muri Camp Kigali muri Kanama 2023, aho cyaranzwe n’umwihariko wo guha icyubahiro no guhemba abanyabigwi mu byiciro bitandukanye by’imyidagaduro.

Ubu Ally Soudy n’abafatanyabikorwa be bahisemo kuva kuri uwo murongo w’igitaramo cyari gisanzwe kizwi, bagashyiraho umushinga mugari ufite izina rishya n’icyerekezo kirenze igitaramo gisanzwe. Ni muri urwo rwego havutse ‘Cabaret Kigali’, umushinga mushya uzabera muri Kigali Universe ku wa 28 Ugushyingo 2026.

Si igitaramo cy’umuziki gusa

Abategura ‘Cabaret Kigali’ bavuga ko atari igitaramo kizibanda ku bahanzi gusa, ahubwo ko ari urubuga rugamije guhuza ibice bitandukanye by’imyidagaduro ahantu hamwe.

Hazaba umuziki wa Live, urwenya, acrobatics, magic, ibiganiro, imbyino, abahanzi n’ibyamamare, byose bigashyirwa hamwe mu buryo bushobora no guhabwa ishusho y’ibiganiro by’imyidagaduro bya Televiziyo.

Ibi bituma ‘Cabaret Kigali’ ishaka kurenga imyumvire isanzwe y’igitaramo aho umuhanzi aza ku rubyiniro, agatarama, abitabiriye bakanyurwa.

Ahubwo abategura uyu mushinga bashaka ko uzaba ubusabane bwagutse, aho umukunzi w’umuziki, umukunzi w’urwenya, ushishikajwe n’imbyino, inkuru, ibiganiro cyangwa ibindi bikorwa by’ubuhanzi ashobora kubona igice kimushimisha.

Ni igitekerezo cyubakiye ku miterere y’ibitaramo bya Cabaret bizwi mu bice bitandukanye by’Isi, ariko abategura ‘Cabaret Kigali’ bavuga ko bashaka kubishyira mu buryo bujyanye n’umuco, ubuhanzi n’umwimerere by’u Rwanda.

Kuki ‘Ally Soudy & Friends’ yahindutse ‘Cabaret Kigali’?

Impinduka y’izina ntabwo ari uguhindura izina gusa. Abategura iki gitaramo bavuga ko ‘Ally Soudy & Friends Live Show’ yari imaze kubaka umusingi, ariko ko hari hakenewe izina n’umushinga bishobora gutwara igitekerezo mu ntera yagutse.

Ally Soudy yagize ati: “Nyuma y’uburyo bwiza “Ally Soudy &Friends Live Show” yakiriwe, twasanze igihe kigeze ngo dushyireho izina n’umushinga mugari kurushaho, bihuye n’icyerekezo dufite cy’ejo hazaza. Cabarate Kigali ni imyidagaduro, umuco, guhanga udushya n’ubusabane.”

Ibi bigaragaza ko intego atari ugutegura igitaramo kimwe gusa, ahubwo ari ukubaka ikirango cy’imyidagaduro ishobora gukomeza gukura no kugira ibindi bikorwa mu bihe bizaza.

‘Cabaret Kigali’ iri gutegurwa na Salax Entertainments ku bufatanye na Watuwave, mu mushinga abategura bavuga ko ugamije gushyira hamwe ubunararibonye bw’abakora mu myidagaduro n’ikoranabuhanga ndetse no guhanga udushya.

Ubufatanye bwabo busobanuye kandi ko Ally Soudy atagumye mu mwanya w’umuntu utegura igitaramo cye bwite gusa, ahubwo ko ari mu rugendo rwo kubaka urubuga rushobora kwakira ibikorwa byinshi by’imyidagaduro.

Uyu mushinga kandi ushaka guha umwanya abahanzi, abanyabugeni, abakora imyidagaduro, abanyamakuru n’abandi bafite uruhare mu ruganda rw’ubuhanzi, kugira ngo babone uburyo bushya bwo kwegera ababakurikirana.

Abategura ‘Cabaret Kigali’ bavuga ko intego yabo ari uko uyu mushinga wazahinduka urubuga rukomeye rw’imyidagaduro mu Rwanda no muri Afurika.

Ni igitekerezo kijyanye n’igihe aho ibitaramo bigenda birenga ku kuba ahantu umuhanzi ajya kuririmbira gusa, ahubwo bigatanga ubunararibonye bwagutse ku muntu wabigiyemo.

Kuri ‘Cabaret Kigali’, umuziki ushobora guhura n’urwenya, urwenya rugahuza n’imbyino, ibiganiro bigahuzwa n’ubuhanzi, naho kubara inkuru bikagira umwanya nk’igice cy’imyidagaduro.

Abategura bavuga ko ibi byose bizakorwa mu buryo bw’umwuga kandi hakifashishwa ikoranabuhanga kugira ngo igitaramo kigere ku bakunzi b’imyidagaduro bari aho ndetse no ku bazagikurikirana binyuze kuri Televiziyo.

Usibye kwidagadura, ‘Cabaret Kigali’ ifite n’indi ntego yo gufasha mu guteza imbere no kumenyekanisha impano n’uruganda rw’ubuhanzi n’imyidagaduro mu Rwanda.

Abategura uyu mushinga bifuza ko abahanzi n’abandi bakora mu ruganda babona ahantu bashobora kwerekana ibyo bashoboye mu buryo butandukanye n’ubusanzwe.

Ni na yo mpamvu bahamagarira abaterankunga, ibigo, ibitangazamakuru, abahanzi n’abandi bafatanyabikorwa kwinjira muri uyu mushinga, kugira ngo ufatwe nk’urubuga rushya rushobora kugira uruhare mu iterambere ry’imyidagaduro.

‘Cabaret Kigali’ izayoborwa na Ally Soudy, umunyamakuru akaba n’umuhanzi, usanzwe azwi mu bikorwa bitandukanye byo guteza imbere imyidagaduro.

Kuri iyi nshuro, uruhare rwe ntirugarukira ku kuba ari we uzayobora igitaramo. Ari no mu kubaka igitekerezo cy’umushinga ushaka guhuza itangazamakuru, umuziki, ikoranabuhanga, guhanga udushya n’imyidagaduro ya Live.

Ibi bishobora gutuma ‘Cabaret Kigali’ iba imwe mu mishinga mishya izagerageza guhindura uburyo ibitaramo by’imyidagaduro bitegurwa n’uko abakunzi babyo babibona.

Ku wa 28 Ugushyingo 2026, muri Kigali Universe, ni bwo hazamenyekana mu buryo bufatika niba iki gitekerezo gishya cya Ally Soudy n’abafatanyabikorwa be kizashobora guhindura imyumvire y’igitaramo gisanzwe, kikaba urubuga ruhuza umuziki, umuco, urwenya, ubuhanzi n’ubusabane.

Kuri Ally Soudy, urugendo rwari rwatangiye nka ‘Ally Soudy & Friends Live Show’ ubu rwinjiye mu kindi cyiciro: ‘Cabaret Kigali’, umushinga ushaka kuba munini kurusha igitaramo kimwe kandi ukagira aho uhuriye n’icyerekezo cy’ejo hazaza cy’uruganda rw’imyidagaduro mu Rwanda. 

Ally Soudy yatangaje ko yahuje imbaraga na sosiyete y’umuziki wa Watuwave mu rugendo rwo gutegura igitaramo ngaruka mwaka bise “Cabarate Kigali.”

‘Cabaret Kigali’ iri gutegurwa na Salax Entertainments ku bufatanye na Watuwave, mu mushinga abategura bavuga ko ugamije gushyira hamwe ubunararibonye bw’abakora mu myidagaduro n’ikoranabuhanga ndetse no guhanga udushya