All Women Together 2026 yahurije muri BK Arena abagore ibihumbi

Igiterane ngarukamwaka cya All Women Together cyatangiye ku mugaragaro, gihuriza hamwe abagore n’abakobwa baturutse hirya no hino ku Isi, aho kuri iyi nshuro cyitabiriwe n’abaturutse mu bihugu 48 bitandukanye. All Women Together Conference yatangiye ku wa 11/08/2026 ikaba izarangira ku wa 15/08/2026 muri BK Arena.

Ni igikorwa cyitabiriwe n’abagore n'abakobwa babarizwa mu bihumbi barimo abahagarariye inzego zitandukanye, abahanzi, abayobozi mu madini n’abandi bafite uruhare mu iterambere ry’umugore.

Mu bagaragaye muri iki giterane harimo n’uwahoze ari Miss Rwanda 2020, Nishimwe Naomie; Ambasador wa Botswana; Miss Queen Kalimpinya; Rev. Dr Antoine Rutayisire wayoboye EAR Remera ariko ubu akaba ari mu kiruhuko cy'izabukuru, Abashumba batandukanye; Umuyobozi Nshingwabikorwa Wungirije w’Akarere ka Gasabo, Mudaheranwa Regis, wari uhagarariye Umujyi wa Kigali, n'abandi.

Mu muhango wo gutangiza ku mugaragaro iki giterane, Apostle Mignonne Kabera yagarutse ku iyerekwa yahawe ryatumye hatangira All Women Together.

Yagaragaje ko intego nyamukuru ari uguhuza abagore bakava mu bice bitandukanye by’Isi, bagasangira ubunararibonye, bagafashanya mu buryo bw’umwuka n’iterambere muri rusange.

Yagize ati: “Iri ni ihuriro rifasha abagore kumenya agaciro kabo, kumenya intego y’ubuzima bwabo no gukorera hamwe mu kubaka Isi nziza kurushaho.”

Bishop Funke Felix Adejumo wo muri Nigeria, yigishije ijambo ry’Imana rikomeye ryakoze ku mitima y’abitabiriye, abashishikariza gukomeza gukorera Imana no kugira uruhare mu guhindura sosiyete binyuze mu bikorwa byiza.

Ku ruhande rwo kuramya no guhimbaza Imana, umuhanzikazi w’icyamamare ukomoka muri Jamaica, Chevelle Franklyn, ni umwe mu bayoboye abandi mu kuramya Imana.

Uretse Chevelle Franklyn, abaririmbyi basanzwe baririmba muri “Women Foundation Ministries” nabo bafatanyije n’ibihumbi by’Abakirisitu mu kuramya no guhimbaza Imana.

All Women Together ikomeje kuba urubuga rukomeye ruhuza abagore baturutse imihanda yose, igamije kubaka ubumwe, kubafasha kwiyubaka no guteza imbere impano n’ubushobozi bwabo mu nzego zitandukanye z’ubuzima.

Muri iyi minsi isigaye, hateganyijwe ibiganiro, amasengesho, n’ibikorwa bitandukanye bigamije gukomeza kongerera abagore imbaraga no kubaha icyerekezo mu buzima bwabo.