Aba bahanzikazi bakomoka mu Karere ka Rubavu batangaje ko iyi ndirimbo yabo nshya izagera ku bakunzi babo mu minsi iri imbere, bagaragaza ko izibanda ku butumwa buhamya ububasha n’intsinzi bya Yesu Kristo, n’ubwami bwe.
Mu butumwa bashyize ku mbuga nkoranyambaga zabo, Alicia na Germaine bagize bati: “Indirimbo yacu nshya yitwa ‘INTARE’ irabageraho vuba. Turifuza guhamya ububasha, ubwami n’intsinzi bya Yesu Kristo, no guhamagarira buri wese kumwizera no kumuhimbaza.”
Bakomeje bagira bati: “Yesu Kristo, Intare yo mu Muryango wa Yuda, yaranesheje! Ibyahishuwe 5:5.” Aya magambo agaragaza ko indirimbo ‘Intare’ izibanda ku butumwa bwo kwizera Yesu Kristo no kumuhimbaza nk’Umwami watsinze.
Ni nyuma y’aho Alicia na Germaine bagaragaje ibyishimo batewe n’uko indirimbo yabo ‘Ibanga’ yujuje miliyoni y’abayirebye kuri YouTube mu gihe gito aho ariyo ndirimbo yabo ya mbere yari yanditse ayo mateka.
Iyi ndirimbo 'Ibanga' yashyizwe kuri YouTube ku wa 8 Nyakanga 2026, igera kuri miliyoni y’abayirebye mu mezi atatu gusa, iba indirimbo yabo ya kabiri ibigezeho, nyuma ya ‘Uri Yo’.
‘Intare’ ishingiye ku butumwa bwo muri Bibiliya
Izina ry’indirimbo nshya, ‘Intare’, rifitanye isano n’amagambo yo muri Bibiliya aboneka mu gitabo cy’Ibyahishuwe 5:5, aho Yesu Kristo yitwa Intare yo mu muryango wa Yuda.
Haranditse ngo: "Umwe muri ba bakuru arambwira ati “Wirira dore Intare yo mu muryango wa Yuda n’Igishyitsi cya Dawidi aranesheje, ngo abumbure igitabo amene ibimenyetso birindwi bigifatanije.”
Iyi shusho ikoreshwa mu kugaragaza intsinzi n’ububasha bya Kristo, ari na byo Alicia na Germaine bavuze ko bifuza guhamya binyuze muri iki gihangano.
Aba bahanzikazi bakunzwe mu ndirimbo zirimo ‘Ibendera’, ‘Rugaba’, ‘Urufatiro’, ‘Uri Yo’ na ‘Ibanga’. Indirimbo zabo zihembura benshi ndetse hari umusore wo mu Karere ka Gatsibo uherutse gutangaza ko zamufashije kuva mu biyobyabwenge.
Aba bakobwa batangiye urugendo rwabo rw’umuziki muri 2024, bakomeza kugeza ubutumwa bw’ukwizera n’ibyiringiro ku bakunzi b’umuziki wo kuramya no guhimbaza Imana. Umuziki wabo wakiranywemo yombi n'abakunzi b'umuziki wa Gospel.
Umwaka wa 2026 warabahiriye cyane dore ko ari bwo indirimbo yabo ya mbere yujuje miliyoni, ni bwo kandi bujuje aba 'subscribers' ibihumbi 100 ndetse ni nabwo baririmbye mu gitaramo gikomeye ari na cyo cya mbere baririmbyemo, cyabereye muri BK Arena.
Mu gihe abakunzi babo bategerezanyije ibyishimo n’amatsiko indirimbo nshya ‘Intare’, haracyategerejwe ko batangaza igihe nyacyo izasohokera. Izaba indi ntambwe mu rugendo rwabo rwo gukoresha impano yabo mu kugeza ubutumwa bwiza ku bantu benshi.
Nyuma y'uko indirimbo yabo "Ibanga" yujuje miliyoni, Alicia na Germaine bateguje indirimbo nshya "Intare"
Indirimbo ‘Intare’ifitanye isano n’amagambo yo muri Bibiliya aboneka mu gitabo cy’Ibyahishuwe 5:5, aho Yesu Kristo yitwa Intare yo mu muryango wa Yuda
REBA INDIRIMBO "IBANGA" YA ALICIA NA GERMAINE