Mu mibare yashyizwe ahagaragara, album ICEMAN yakomeje kuguma ku mwanya wa mbere ku rutonde rwa Billboard 200 nyuma yo gukora imibare ihwanye na kopi 225,000 zagurishijwe muri Leta Zunze Ubumwe za Amerika mu cyumweru cya kabiri. Nubwo iyi mibare ikiri myiza cyane, yagabanutseho 52% ugereranyije n’icyumweru cya mbere iyi album yari imaze isohotse.
Mu cyumweru cyayo cya mbere, Drake yari yanditse amateka akomeye mu ruganda rw’umuziki ubwo yasohoraga albums eshatu icyarimwe zirimo ICEMAN, HABIBTI na MAID OF HONOUR, zose zigahita zifata imyanya itatu ya mbere ku rutonde rwa Billboard 200. Ni ibintu byafashwe nk’amateka adasanzwe mu myaka isaga 70 uru rutonde rumaze rubaho.
Nubwo ICEMAN yakomeje kuyobora urutonde rwa Billboard rwa Album 200 zikunzwe cyane, izindi albums za Drake na zo zakomeje kwitwara neza. Album HABIBTIyagurishijwe kopi zingana na 53,000 equivalent album units, mu gihe MAID OF HONOUR yo yakusanyije 42,000 equivalent album units mu cyumweru cya kabiri.
Mu ndirimbo zikomeje gukundwa cyane kuri album ICEMAN harimo “Make Them Cry” na “Dust”, zakomeje kwigarurira imitima y’abakunzi b’umuziki hirya no hino ku Isi.
Ku ruhande rwa HABIBTI, indirimbo zirimo “WNBA” na “High Fives” ni zo zikomeje kuvugisha benshi, mu gihe kuri MAID OF HONOUR hagaragayemo ubufatanye bukomeye bwa Drake n’abahanzi batandukanye.
Muri izo ndirimbo harimo “Outside Tweaking” yakoranye na Stunna Sandy, ndetse na “Which One” yahuriyemo na Central Cee, zikaba zikomeje gukundwa cyane ku mbuga zicuruza umuziki no ku maradiyo atandukanye.
Nubwo imibare y’igurishwa rya ICEMAN yagabanutse ugereranyije n’icyumweru cya mbere, kuba ikomeje kuguma ku mwanya wa mbere birerekana ubukombe bwa Drake ndetse n’uburyo akomeje kugira igikundiro gikomeye mu bakunzi b’umuziki ku rwego mpuzamahanga.
Album ICEMAN ya Drake ikomeje kuguma ku mwanya wa mbere ku rutonde rwa "Billboard 200"
Umwanditsi: Patrick Kabano