Uyu mukino ufite igisobanuro gikomeye kuko Al Hilal iri ku mwanya wa mbere n’amanota 70 nyuma yo gukina imikino 30, irusha amanota 11 APR FC yamaze gukina imikino 31 ndetse irusha amanota 12 Al Merrikh SC ifite umukino umwe w’ikirarane.
Amakuru ava muri Rwanda Premier League avuga ko mu gihe Al Hilal yabona amanota atatu cyangwa rimwe imbere ya Gasogi United, yahita ihabwa igikombe ako kanya, bitandukanye n’ibyari byavuzwe mbere ko kizatangirwa ku mukino wa nyuma cyangwa uwawubanjirije.
Al Hilal imaze kugira umwaka udasanzwe muri BK Pro League, aho kugeza ubu imaze gutsinda imikino myinshi muri shampiyona ndetse ikaba ari nayo ifite ubwugarizi bwiza n’ubusatirizi bukomeye. Mu mikino 30 imaze gukina, yatsinzemo 22 inganya 4 itsindwa 4, aho Ari ikipe ikina umukino uri ku rwego rwo hejuru kuva shampiyona yatangira.
Iyi kipe yo muri Sudani kandi iri gukora amateka yo kuba ikipe ya mbere itari iy’u Rwanda ishobora gutwara BK Pro League, ibintu byakuruye impaka n’ibitekerezo byinshi mu bakunzi b’umupira w’amaguru mu Rwanda no muri Sudani.
Ku rundi ruhande, Gasogi United irasabwa gukora ibitangaza niba ishaka gukoma mu nkokora Al Hilal mu rugendo rwo kwegukana igikombe cya shampiyona.