Yago yabigarutseho mu butumwa burebure yashyize hanze mu
mabaruwa atandatu, agaragaza ko yicuza ku byo yakoze n’amagambo yagiye avuga,
ndetse ko yiteguye guhindura imyitwarire kugira ngo yongere kubana neza
n’abamukurikira ndetse n’abo yagiye agirana na bo ibibazo.
Uyu muhanzi wamamaye cyane binyuze ku rubuga rwa YouTube,
aho yagiye atanga umwanya ku nkuru n’ibiganiro bitandukanye, yavuze ko urugendo
rwe rutatangiye agamije kugirana amakimbirane n’abantu, ariko ko uko igihe
cyagiye gihita hari aho yaje gutandukira, bigatuma amagambo ye n’imyitwarire ye
bitangira kunengwa.
Yemera ko hari ibyo yavuze n’ibyo yakoze byatumye abantu
batakimwumva nk’uko byahoze, bityo ko igihe kigeze ngo yisuzume, yemere amakosa
yakoze kandi agaragaze ubushake bwo kuyakosora.
Mu byo Yago yagarutseho by’umwihariko harimo umubano we na
Bruce Melodie, umaze igihe urangwa no kutumvikana ndetse n’amagambo akomeye
yagiye amuvugaho.
Yago yavuze ko atazongera gukomeza kuvuga cyangwa gukora
ibintu bigamije kugirira nabi Bruce Melodie, ashimangira ko n’ibyo abantu
bashobora kuba batekereza ko azakomeza kumukorera bitazongera kubaho.
Yagize ati: “Ibyo mutekereza byose muribeshya. Ubu, ngubu
kugeza kuri uyu munota, ibintu byose mutekereza nari gukorera Bruce Melodie
bibi, nta kintu na kimwe kibi kizongera guturuka iwanjye kijya kwa Bruce
Melodie.”
Yakomeje avuga ko ibyo abantu baba biteze ko azakora kuri
uyu muhanzi bitazongera kubaho, ashimangira ko yifuza kuva mu bihe byaranzwe no
gutongana, kwataka abantu no gukoresha imvugo zikomeretsa abandi.
Yago yanagarutse ku magambo yigeze gukoresha agereranya
indirimbo ya Bruce Melodie yitwa ‘Irya 4’ n’amategeko ya Gitera, avuga ko
ashaka gukoresha ururimi rwe kugira ngo agaragaze ko yicuza ku byo yavuze.
Yagize ati: “Uyu mugabo witwa Bruce Melodie, uko nakoresheje
amagambo yanjye nkafata indirimbo ye yitwa ‘Irya 4’ nkayigereranya n’amategeko
ya Gitera, ni na ko ngiye gukoresha ururimi rwanjye mvuguruza ibyo ngibyo.”
Yago yasobanuye ko amagambo akomeye yagiye avuga kuri Bruce
Melodie yayatewe n’uburakari yari afite kubera ibyo yumvaga uyu muhanzi
yamukoreye. Icyakora, mu magambo ye, yemeye ko kuba yari afite umujinya
bitagombaga kuba urwitwazo rwo gukomeza gukomeretsa abandi.
Ibi bigaragaza ko uyu muhanzi yifuza gushyira iherezo ku
makimbirane yamaze igihe avugwaho, aho gukomeza kuyagura binyuze mu magambo
ashobora kongera kubiba umwuka mubi hagati ye na Bruce Melodie.
Uretse Bruce Melodie, Yago yanagarutse ku bantu batandukanye
bagiye bamugira inama, barimo ababyeyi bagiye bamubwira ibyo babonaga ko
adakora neza.
Yavuze ko hari igihe yabaga adashaka kumva inama bamugiraga,
ariko ko ubu abona ko akwiriye kubashimira no kubasaba imbabazi ku buryo
ashobora kuba yarakiriye amagambo cyangwa imyitwarire itari ikwiye.
Yagize ati: “Mboneyeho no gusaba imbabazi, ababyeyi bagiye
bambwira nkavuga nti ‘Oya!’ Ndabashimiye cyane, kandi mbasabye n’imbabazi.”
Aya magambo agaragaza ko Yago atifuza kugarukira gusa ku
gusaba imbabazi abo yagiranye na bo amakimbirane, ahubwo ko anashaka kongera
kubaka umubano n’abagiye bagerageza kumuyobora, nubwo hari igihe atumvaga ibyo
bamubwiraga.
Mu butumwa bwe, Yago yagaragaje ko yifuza guhabwa amahirwe
yo guhinduka, asaba Abanyarwanda kumwakira nk’umwana wabo no kumuha umwanya wo
kugaragaza ko ashobora kwitwara mu buryo butandukanye n’ubwo bari
baramenyereye.
Yavuze ko yiteguye kwirinda umujinya, amagambo atameshe
n’imvugo zishobora guteza impaka cyangwa gutuma abantu bamufata mu buryo
butandukanye n’ubwo yifuza.
Icyo asaba ni uko abantu batarebera gusa ku makosa yakoze,
ahubwo banamuha amahirwe yo kugaragaza impinduka avuga ko yiyemeje.
Nubwo Yago yemeye ko yagiranye na Bruce Melodie ibihe birimo
umujinya n’amagambo akomeye, yanashimangiye ko amufata nk’umuhanzi ukomeye,
atitaye ku makimbirane bagiranye.
Yavuze ko ibyo yagiye avuga bitagomba gufatwa nk’ikimenyetso
cy’uko atemera ubushobozi bwa Bruce Melodie, ahubwo ko byaturutse ku
marangamutima yari afite muri icyo gihe.
Mu gusoza ubutumwa bwe, Yago yagaragaje ko yumva umutima we
urimo gutuza no kuva mu bihe by’umujinya n’ubwigunge, ashimangira ko ubumwe ari
bwo bukwiye guhabwa agaciro kurusha amakimbirane.
Yagize ati: “Nzi neza ko umutima wanjye uciye bugufi,
umutima wanjye urimo urabohoka, umutima wanjye ntabwo ukirimo ibintu byo
kwifunga cyane, ubumwe buruta byose.”
Aya magambo agaragaza icyifuzo cya Yago cyo kuva mu bihe
byaranzwe no kutumvikana n’abandi, agatangira urugendo rushya rushingiye ku
kwicuza, kwiyubaka no kubana neza n’abo bagiye batandukana mu bitekerezo.
Yago Pon Dat ni umwe mu bantu bagiye bamenyekana mu myidagaduro nyarwanda binyuze mu biganiro n’amakuru yagiye atambutsa kuri YouTube, aho yagiye agira uruhare mu gutuma ibibazo bitandukanye bivugwa mu ruhame.
Yago Pon Dat yasohoye amabaruwa atandatu asaba imbabazi
Abanyarwanda, yemera ko uburakari bwagize uruhare mu magambo n’imyitwarire
byagiye bimuteza kutumvikana n’abandi, ashimangira ko yifuza guhinduka no
gusubira mu murongo mwiza
Yago Pon Dat yemeye ko uburakari bwatumye avuga amagambo akomeye kuri Bruce Melodie, ashimangira ko atazongera kugira ikintu kibi amukorera cyangwa amuvugaho. Yanamusabiye imbabazi ku magambo yigeze gukoresha agereranya indirimbo ye ‘Irya 4’ n’amategeko ya Gitera, avuga ko yicuza ku byo yavuze
KANDA HANO UBASHE KUREBA IKIGANIRO KIGARUKA KURI YAGO PONDAT ASABA IMBABAZI BRUCE MELODIE