Itangazo rigenewe abanyamakuru ryasohotse kuri uyu wa Kane tariki ya 7 Gicurasi 2026, rivuga ko Karasira Aimable yajyanywe ku bitaro bya Nyarugenge, "nyuma yo gufatwa anywa ingano irengeje igipimo cy'imiti ye y'uburwayi asanganywe, cyagenwe na muganga."
Rivuga ko "RCS itegereje Raporo y'abaganga, ku cyateye uru rupfu."
Amakuru avuga ko Karasira Aimable yafashe ingano irengeje igipimo cy'imiti ye y'uburwayi bwo mu mutwe yari asanganywe.
Aimable Karasira wahoze ari umwalimu muri Kaminuza y'u Rwanda, yari yasoje igihanno cye cy’igifungo cy’imyaka itanu kuri uyu wa Gatatu tariki ya 6 Gicurasi 2026, ndetse yitegura gusohoka mu igororero rya Mageragere.
Uyu mugabo yari yakatiwe gufungwa imyaka itanu n'ihazabu y'ibihumbi 500 y'u Rwanda ahamijwe icyaha cyo gukurura amacakubiri, nk'uko byatangajwe n'Urukiko.
Urugereko rwihariye rw'Urukiko Rukuru ruherereye i Nyanza mu Majyepfo y'u Rwanda rwavuze ko Karasira adahamwa n'ibyaha bitatu mu byo yaregwaga n'ubushinjacyaha, ibyo ni;
Icyaha cyo guhakana Jenoside, Icyaha cyo guha ishingiro Jenoside, n'icyaha cyo guteza imvururu cyangwa imidugararo muri rubanda.
Urukiko rwatangaje ko ibirego bibiri by'ubushinjacyaha bitakiriwe. Ibyo ni; Ikirego cyo kudasobanura inkomoko y'umutungo, N'icyaha cy'iyezandonke
Icyaha cyamuhamye cyo gukurura amacakubiri gishingiye ku kiganiro yatanze kuri YouTube tariki ya 23 Gicurasi (5) 2021. Yafunzwe hashize iminsi irindwi nyuma y'icyo kiganiro kiri mu byashingiweho aregwa n'ubushinjacyaha.
Urwego rw’u Rwanda rushinzwe Igororero (RCS) rwatangaje ko Aimable Karasira yapfiriye mu bitaro bya Nyarugenge i Kigali
