Ubushakashatsi bwatangajwe ku wa Kane mu kinyamakuru Science, bwakozwe n’abashakashatsi bo muri Stanford University na Arc Institute. Bakoresheje porogaramu ya AI yitwa Evo, yatojwe gukoresha amakuru y’uturemangingo (genomes) akomoka ku binyabuzima bitandukanye.
Abashakashatsi bayikoresheje gukora ibihumbi by’imiterere y’uturemangingo tw’udusimba dushobora kwandura muri bagiteri ya E. coli. Muri izo genomes ibihumbi zakozwe na AI, abashakashatsi bakoze kandi bagerageza hafi 300 muri laboratwari, basanga 16 muri zo zishobora gukora nka virusi nzima.
Izi virusi nshya ni bacteriophages, ubwoko bwa virusi bwibasira bagiteri gusa kandi budashobora kwanduza abantu.
Zishobora gufasha kurwanya bagiteri zitakira imiti
Ubushakashatsi bwagaragaje ko kuvanga zimwe muri izi virusi nshya byashoboye kurwanya izindi ngero za E. coli zari zarabayeho zitakira imiti ya antibiyotike.
Abashakashatsi bavuga ko ibi bishobora gutanga inzira nshya yo gukora imiti ikoresha bacteriophages mu kurwanya bagiteri zihinduka vuba kandi zikagenda zidakira imiti.
Ibi ni ingenzi mu gihe isi ihanganye n’ikibazo cyo kwiyongera kwa bagiteri zititabira antibiyotike, bigatuma indwara zimwe na zimwe zigenda zigora kuvura.
Jordi García Ojalvo, umwarimu w’ibijyanye na systems biology muri Pompeu Fabra University yo muri Barcelona, yavuze ko ubu bushakashatsi ari intambwe ikomeye mu bya siyansi.
Nubwo ubushakashatsi butanga icyizere, hari impungenge zikomeye ku buryo AI ishobora gukoreshwa mu gukora ibinyabuzima bishya.
Abaganga bo muri Johns Hopkins Center for Health Security bavuze ko ubushobozi bwo gukoresha AI mu gukora genomes za virusi busanzwe buhari, ariko ko amategeko n’uburyo bwo kugenzura neza iri koranabuhanga bitaragera ku rwego rukwiye.
Bashimangiye ko hakwiye kwitonderwa cyane ikoreshwa rya AI mu gukora genomes z’indwara zishobora kwanduza abantu, inyamaswa cyangwa ibimera.
Abashakashatsi bavuze ko ubu bushakashatsi bwibanze kuri E. coli no kuri bacteriophages zidashobora kwanduza abantu, bityo ko bitaramenyekana niba uburyo bwakoreshejwe bwatanga umusaruro nk’uwo ku zindi virusi.
García Ojalvo we yavuze ko ibyago by’ubu bushakashatsi bikiri hasi ugereranyije n’ibindi bikorwa bya AI mu binyabuzima, kuko genomes zakozwe na AI zigomba kubanza kugeragezwa imwe ku yindi kugira ngo hamenyekane niba koko ishobora gukora.
Kuba muri genomes nyinshi zakozwe habonetse virusi 16 gusa zashoboye gukora, na byo bigaragaza ko AI itaragera ku rwego rwo guhita ikora virusi ikora neza buri gihe.
Nubwo bimeze bityo, abahanga basaba ko ubushakashatsi nk’ubu bukomeza gukorwa hifashishijwe ingamba zikomeye za biosafety na biosecurity, kugira ngo ikoranabuhanga ritazakoreshwa mu buryo bushobora guteza akaga abantu cyangwa ibidukikije.