Bifashishije ikoranabuhanga rya Artificial Intelligence (AI), basanze impinduka nto mu majwi y’umuntu ishobora kugaragaza udusebe ku ijwi (lesions) ku bantu basanzwe barwaye kanseri y’ijwi. Abashakashatsi bizeye ko AI ishobora kwigishwa kumenya izi mpinduka mu gihe cy’imyaka mike iri imbere.
Mu Bwongereza, abantu bagera ku 2,000 buri mwaka bashyirwaho ibimenyetso bya kanseri y’ijwi (laryngeal cancer). Kugira ijwi ryahindutse mu gihe kirenze ibyumweru bitatu bishobora kuba ikimenyetso gikomeye, kandi bikwiye gusuzumwa na muganga.
Gukoresha AI mu gusuzuma iyi ndwara bishobora gusimbura ibipimo bibabaza bikoreshwa ubu nka biopsy cyangwa nasendoscopy — uburyo bwo kwinjiza umuyoboro uheraho na camera binyuzwa mu zuru bigacishwa mu muhogo.
Itsinda ry’abanyamerika riri mu mushinga Bridge2AI-Voice ryakusanyije amajwi y’abantu 300, bamwe muri bo bafite kanseri y’ijwi. Bize ku bintu bitandatu by’ingenzi mu majwi arimo: uburebure bw’ijwi (pitch), jitter (impinduka mu burebure bw’ijwi), shimmer (impinduka mu bukomere bw’ijwi), n’umubano w’ijwi n’urusaku (harmonic-to-noise ratio).
Basanganye itandukaniro rikomeye hagati y’abagabo bafite kanseri cyangwa ubundi burwayi bw’ijwi nk’udusebe n’utubumbe, n’abatabufite — cyane cyane ku gipimo cy’umubano w’ijwi n’urusaku. Bavuga ko bishoboka ko ibisubizo bisa bishobora kugaragara ku bagore nibaramuka bakusanyije amakuru menshi.
Nk'uko biri mu nkuru ducyesha The Sun, Dr Phillip Jenkins wo muri Oregon Health & Science University yavuze ati: "Kugira ngo duhindure ubu bushakashatsi igikoresho cya AI kibasha kumenya udusebe tw’ijwi, tugomba gutoza imashini dukoresheje amakuru menshi cyane y’amajwi, kandi asuzumwe n’inzobere."
Yakomeje avuga ko bazagerageza sisitemu kugira ngo irebe ko ikora neza ku bagore n’abagabo. Yongeraho ko ibikoresho byo gusuzuma ubuzima hakoreshejwe ijwi bisanzwe biri mu igerageza kandi ko nibamara kubona amakuru menshi no kubihamya mu buryo bwa gihanga, ibikoresho bisa n’ibi bishobora gutangira kugeragezwa mu myaka ibiri iri imbere.