Nk'uko bigaragazwa na raporo The Wealth Report 2026, igaragaza ko ibi bihugu bikomeje kuba ibigo bikomeye by'ubukungu n'ishoramari ku mugabane wa Afurika, bikaba ari na byo bibarizwamo abantu benshi bafite umutungo munini cyane.
Iyi raporo isobanura ko umuntu abarirwa mu cyiciro cy'abakire b'ikirenga (Ultra-High-Net-Worth Individuals - UHNWIs) ari ufite umutungo ufite agaciro ka nibura miliyoni 30 z'Amadolari ya Amerika, hatabariwemo inzu atuyemo.
Nubwo aba bantu ari bake cyane ugereranyije n'abatuye Isi, bafite uruhare runini mu bukungu bw'Isi kuko ari bo bashora amafaranga menshi mu bucuruzi, bashinga ibigo bikomeye ndetse bakagira uruhare rukomeye mu ishoramari.
Afurika y'Epfo iyoboye Afurika
Afurika y'Epfo iza ku mwanya wa 37 ku Isi, ikaba ifite abantu 1,347 bafite umutungo urenga miliyoni 30 z'Amadolari ya Amerika. Ibi bituma iba igihugu cya mbere muri Afurika gifite abakire b'ikirenga benshi.
Biteganyije uyu mubare ushobora kuzagera ku bantu 1,564 mu mwaka wa 2031, nubwo igihugu gikomeje guhura n'imbogamizi z'ubukungu.
Misiri iza ku mwanya wa kabiri
Misiri iri ku mwanya wa 42 ku rwego rw'Isi, ifite abakire b'ikirenga 822. Iyi raporo iteganya ko mu myaka itanu iri imbere uyu mubare uzazamuka ukagera ku 977, bikagaragaza ko igihugu gikomeje kugira umuvuduko mu kurema umutungo.
Morocco nayo iri mu bihugu bya mbere
Ku mwanya wa gatatu muri Afurika haza Morocco, iri ku mwanya wa 44 ku Isi, ifite abantu 432 bafite umutungo urenga miliyoni 30 z'Amadolari. Biteganyijwe ko mu mwaka wa 2031, umubare wabo uzagera ku 550.
Ni iki kiri gutera kwiyongera kwa baherwe ku Isi?
Hagati ya 2021 na 2026, umubare w'abantu bafite umutungo urenga miliyoni 30 z'Amadolari wazamutse uva ku 551,435 ugera ku 713,626.
Ibi bivuze ko mu myaka itanu hiyongereyeho abantu 162,191 binjiye muri iki cyiciro, bingana n'impuzandengo y'abantu 89 buri munsi bageza ku mutungo urenga miliyoni 30 z'Amadolari.
Gusa 41% by'abantu bose binjiye mu cyiciro cy'abakire b'ikirenga hagati ya 2021 na 2026 bakomoka muri Leta Zunze Ubumwe za Amerika, ibintu byerekana imbaraga z'ubukungu bw'iki gihugu ndetse n'ubushobozi bwacyo mu kurema umutungo.
Ibi bisobanuye ko Leta Zunze Ubumwe za Amerika arizo ziza ku mwanya wa mbere ku Isi mu kugira abakire b'ikirenga benshi, zigakurikirwa n'u Bushinwa, bufite hafi abantu 122,000 bafite umutungo urenga miliyoni 30 z'Amadolari.
Ibi bihugu byombi bihurije hamwe hafi 55% by'abakire b'ikirenga bose ku Isi, bikomeje kwerekana ubudahangarwa bwabyo mu rwego rw'imari, ikoranabuhanga, ubucuruzi n'ishoramari.