Afurika y’Epfo iyoboye ibihugu bya Afurika bidatekanye muri ½ cya 2025

Ibihugu bifite igipimo kinini cy’ibyaha bihura n’ingaruka nyinshi zirimo igabanuka ry’ishoramari, igihombo ku musaruro w’igihugu, kudahabwa icyizere n’abaturage, ndetse n’ihungabana ry’umutekano rusange. Abashoramari benshi, yaba ab’imbere mu gihugu cyangwa ab’amahanga, bagira impungenge zo gushora imari ahantu hatarangwa n’umutekano, bigatuma bahitamo kwimukira mu bindi bihugu bifite ituze n’amahoro.

Iyo ishoramari rigabanutse, biba bigoye ko hashyirwaho imirimo myinshi, bituma n’imisoro yagombaga kwinjira mu isanduku ya Leta igabanuka, ndetse n’amahirwe yo kwihangira udushya agasubira inyuma. Umutekano muke kandi utuma abaturage batinya gukora ubucuruzi nijoro, abana bagatinya kujya ku mashuri, n’abaturage muri rusange batagendagenda uko babyifuza.

Abagore n’abaturage bafite intege nke bo bahura n’ibibazo bikomeye cyane, kuko barushaho guhura n’imbogamizi mu buzima bwa buri munsi. Ibi byose bitera kutizera inzego z’umutekano no kwivangura mu baturage, bikagira ingaruka mbi ku bumwe n’ubwumvikane mu muryango mugari.

Ikindi kandi, iyo inzego zishinzwe umutekano zifatwa nk’izidakora neza cyangwa zivugwamo ruswa, abaturage batangira gushaka ubutabera mu buryo bwa giturage cyangwa bwo kwihorera, bigatuma amategeko adakurikizwa neza, bityo Leta ikabura icyizere mu baturage bayo.

Nk’uko ubushakashatsi bushya bwakozwe n’urubuga rwa Numbeo bubigaragaza, kugeza hagati muri 2025, ibihugu 5 bifite umutekano muke kurusha ibindi muri Afurika ni Afurika y’Epfo, Angola, Repubulika Iharanira Demokarasi ya Congo, Nigeria na Cameroun. Ibi bihugu byagaragaje igipimo kiri hejuru cy’ibyaha birimo urugomo, ubujura, ihohotera rishingiye ku gitsina, ruswa no gutwara imbunda mu buryo butemewe n’amategeko.

Afurika y’Epfo, iyoboye uru rutonde, iri mu bihugu bifite umubare munini w’ibyaha by’urugomo n’ubujura ku rwego rwo hejuru, byibasiye cyane imijyi minini nka Johannesburg na Cape Town. Angola na RDC byo bigaragaramo ibibazo by’umutekano muke bikomoka ku mateka ya politiki ashingiye ku ntambara no kugorwa n’ubuyobozi budahagije.

Nigeria n’ubwo ari kimwe mu bihugu bikize ku mutungo kamere, nayo yugarijwe n’imitwe yitwaje intwaro n’iterabwoba irimo uwa Boko Haram. Cameroun nayo ikomeje guhura n’ibibazo by’umutekano muke mu bice by’amajyaruguru n’uburengerazuba, aharangwa imyivumbagatanyo n’imitwe yitwara gisirikare.

Ibi byose bigaragaza ko kugira igihugu gitekanye bitari amahirwe, ahubwo bisaba ubushake bwa politiki, imiyoborere inoze, gukorera mu mucyo n’imbaraga mu kubungabunga ituze ry’abaturage. Umutekano ni inkingi y’iterambere rirambye, kandi Afurika izagera ku ntego zayo igihe izaba ibashije guhashya ibyaha n’umutekano mucye uhungabanya ubuzima bw’abaturage bayo.

Dore ibyavuye mu bushakashatsi bwa Numbeo: