Uyu mushinga uzwi nka Tati Solar Project, uzaba ufite ubushobozi bwo gutanga megawati 100 z’amashanyarazi, ukaba uteganyijwe gutangira gukora mu buryo bwuzuye mu mwaka wa 2027.
Nk'uko byatangajwe n'ikinyamakuru Business Insider Africa, uyu mushinga urimo gutezwa imbere na sosiyete Etavi Renewables, ikorera muri Botswana kandi ikaba ifitemo imigabane ya sosiyete Shumba Energy Ltd.
Ikigo cy’imari Rand Merchant Bank (RMB) cyo muri Afurika y’Epfo ni cyo kiyoboye iyi gahunda yo gushaka no gutegura iyi nkunga ya miliyoni 100 z’Amadolari.
Amashanyarazi azaturuka kuri uru ruganda azacuruzwa binyuze muri Southern African Power Pool (SAPP), isoko rihuza ibihugu byo mu majyepfo y’Afurika mu gucuruzanya amashanyarazi hagati yabyo.
SAPP iha abaturage bagera miliyoni 360 bo mu bihugu 12 birimo Botswana, Afurika y’Epfo na Mozambique. Ifite ubushobozi bwo gukwirakwiza amashanyarazi angana na gigawati 47.7, ikaba ifatwa nk’isoko ry’amashanyarazi rigezweho kurusha andi muri Afurika.
Abasesenguzi mu bukungu bavuga ko iri soko rifite amahirwe menshi yo kwakira amashanyarazi aturuka ku ngufu zisubira, cyane cyane izuba n’umuyaga.
Uyu mushinga ugamije iki?
Uyu mushinga uje mu gihe Botswana ikomeje guhura n’ibibazo byo kubona amashanyarazi ahagije bitewe n’ibikorwaremezo bishaje bikoresha amakara, umusaruro muke w’amashanyarazi imbere mu gihugu ndetse no kugabanuka kw’ayo yatumizaga muri Afurika y’Epfo.
Kubera iyi mpamvu, igihugu kirashaka kugabanya kwishingikiriza ku mashanyarazi aturuka hanze, kongera uburyo butandukanye bwo kuyabyaza umusaruro no kwitegura kuba kimwe mu bihugu bishobora kuzajya biyagurisha mu karere.
Umuyobozi ushinzwe ibikorwaremezo muri RMB, Siyanda Mflathelwa, yavuze ko bashoboye gutegura uburyo bw’imari butuma umushinga nk’uyu ushoboka kandi ukunguka, ndetse bikazongera ingano y’amashanyarazi acuruzwa ku isoko rya SAPP.
Kuki ibihugu by’Afurika bikomeje gushora imari mu kubyaza izuba umusaruro?
Mu myaka yashize, ibihugu byinshi bya Afurika byakajije umurego mu gushora imari mu mishinga y’amashanyarazi akomoka ku mirasire y’izuba, ububiko bw’ingufu n’imiyoboro iyatwara.
Muri Zambia, gahunda ya Scaling Solar yatewe inkunga n’Itsinda rya Banki y’Isi yafashije gukurura abashoramari bigenga mu rwego rw’ingufu. Mu Misiri na ho hashyizweho inkunga nini muri uyu mushinga ndetse no kuvugurura imiyoboro y’amashanyarazi.
Afurika y’Epfo, ifite isoko rinini ry’ingufu z’izuba kuri uyu mugabane, na yo yifashishije cyane abashoramari bigenga nyuma y’ibibazo by’igihe kirekire by’ibura ry’amashanyarazi.
Abahanga bavuga ko uyu mushinga nugerwaho neza, ushobora kongera icyizere cy’abashoramari ku mishinga minini y’ingufu muri Afurika, nubwo uru rugendo rugihura n’imbogamizi zirimo ibigo by’amashanyarazi bidafite ubushobozi buhagije, ihindagurika ry’agaciro k’ifaranga, inyungu z’inguzanyo zihanitse ndetse n’imiyoboro idahagije yo gutwara amashanyarazi.
Uyu mushinga ushobora gutuma Botswana iba kimwe mu bihugu bifite uruhare runini mu guhangana n’ikibazo cy’ibura ry’amashanyarazi mu karere k’amajyepfo ya Afurika, mu gihe icyifuzo cy’ingufu zikomoka ku izuba gikomeje kwiyongera.