Ibitaro bya Groote Schuur biherereye i Cape Town muri Afurika y’Epfo ni byo byaje ku mwanya wa mbere muri Afurika, biza ku mwanya wa 25 ku Isi.
Raporo ya Brand Finance igaragaza ko iki bitaro cyazamutseho umwanya umwe ugereranyije na 2025, kikagira amanota 74,1 kuri 100 mu gipimo cyerekana imbaraga z’izina n’icyubahiro cy’ikigo.
Ibitaro bya Qasr El Eyni byo muri Misiri byaje ku mwanya wa 27 ku Isi, mu gihe Ishami ry’Ubuvuzi rya Kaminuza ya Ain Shams, na ryo ryo muri Misiri, ryaje ku mwanya wa 43.
Ibindi bitaro by’Afurika biri mu 100 bya mbere
Urutonde rwa 2026 rugaragaza ibigo bitandatu byo muri Afurika biri mu 100 bya mbere ku Isi. Harimo ibitaro bya Mohammed VI University Hospital Center byo muri Maroc, byaje ku mwanya wa 56, n’ibya Tygerberg byo muri Afurika y’Epfo byavuye ku mwanya wa 76 mu 2025 bikagera ku wa 63.
Ibyo muri Maroc byagabanutseho imyanya 19, kuko mu mwaka wabanje byari ku mwanya wa 37.
Raporo igaragaza ko Groote Schuur ari byo byaje ku mwanya wa mbere ku Isi mu bijyanye no guhugura abanyeshuri biga ubuvuzi, mu gihe Tygerberg yabonye amanota yuzuye mu guhuza inyigisho, ubushakashatsi no kuvura abarwayi.
Ibi bipimo byibanda ku bushobozi ibitaro bifite mu kuvura abarwayi, gukora ubushakashatsi no gutanga ubumenyi n’amahugurwa ku banyeshuri n’inzobere mu buvuzi.
Nigeria ifite ibigo byinshi mu byashyizwe mu myanya ya 101 kugeza kuri 250
Muri byo harimo Lagos University Teaching Hospital (LUTH), iri ku mwanya wa 108 ku Isi, ikaba yarazamutseho imyanya 12. Iki kigo kizwi mu bijyanye n’amahugurwa y’abiga ubuvuzi, kandi cyakomeje kuvugurura ibikorwa remezo no kwagura serivisi z’inzobere.
Mu 2025, cyafunguye ikigo cyihariye cyagenewe kuvura indwara z’uruhu.
Ibindi bigo bya Nigeria biri kuri uru rutonde birimo Lagos State University Teaching Hospital, University College Hospital yo muri Ibadan, University of Benin Teaching Hospital, University of Port Harcourt Teaching Hospital na University of Uyo Teaching Hospital.
Maroc na yo ifite ibindi bigo biri muri iri tsinda, birimo ibitaro bya Hassan II byo muri Fez, Ibn Sina byo muri Rabat na Ibn Rochd byo muri Casablanca. Afurika y’Epfo ifite ibindi bigo birimo Charlotte Maxeke Johannesburg Academic Hospital na Steve Biko Academic Hospital.
Ku rwego mpuzamahanga, Johns Hopkins Medicine yo muri Leta Zunze Ubumwe za Amerika yakomeje kuza ku mwanya wa mbere mu bigo by’ubuvuzi bikomatanya kuvura, ubushakashatsi n’amahugurwa, ku nshuro ya kabiri yikurikiranya.
Yakurikiwe na Oxford University Hospitals NHS Foundation Trust yo mu Bwongereza. Cambridge University Hospitals NHS Foundation Trust na Singapore General Hospital na byo byinjiye mu bigo 10 bya mbere ku Isi.
Amerika ya Ruguru ni yo yagize ibigo byinshi muri 100 bya mbere, aho ifitemo 29.
Raporo ya Brand Finance igaragaza ko ubufatanye n’ibigo mpuzamahanga, birimo King’s College London na Duke University, bushobora gufasha ibigo by’ubuvuzi byo muri Afurika kongera ubushobozi mu bushakashatsi, mu buvuzi bw’inzobere no mu mahugurwa.
Urutonde rwakozwe ku nshuro ya kane rugaragaza uko abaganga, b’inzobere n’abandi bakora mu rwego rw’ubuzima babona ibigo by’ubuvuzi, hashingiwe ku ruhare rwabyo mu kuvura abarwayi, gukora ubushakashatsi no guhugura inzobere.