Gozbert ni umwe mu bahanzi ba Gospel bazwi cyane muri Tanzania no muri Afurika y’Iburasirazuba. Azwi cyane kubera ijwi rye ry’umwimerere, indirimbo zishingiye ku buzima bwa buri munsi, ubutumwa bw’ukwizera n’uburyo ahuza umuziki wa Gospel n’injyana za none.
Yavutse ku wa 12 Mata 1991, avukira i Mwanza muri Tanzania, aho yatangiriye urugendo rwe rw’umuziki. Mbere yo kumenyekana cyane nk'umuramyi, Gozbert yakoze ibikorwa bitandukanye byo gutunganya no kwandika indirimbo, ndetse azwiho kuba yarakoresheje izina “Lollipop” mu ntangiriro z’urugendo rwe rw’umuziki.
Nyuma yaje kwerekeza cyane ku muziki wo kuramya no guhimbaza Imana, ahanga indirimbo zishingiye ku kwizera kwe kwa Gikristo ndetse anatangiza label ye ya Mini Sound. Mu myaka yakurikiyeho, Goodluck Gozbert yubatse izina rikomeye mu muziki wa Gospel wo muri Afurika y’Iburasirazuba.
Indirimbo nka “Ipo Siku”, “Acha Waambiane”, “Wastahili Sifa”, “Shukurani”, “Kama Si Wewe”, “Mwenye Majibu”, “Nibadilishe”, “Umeshinda Yesu” na “Hauwezi Kushindana” zagiye zimugira umwe mu bahanzi bakomeye muri iyi njyana.
Umuziki wa Goodluck Gozbert ushingiye ku nkuru z’ubuzima
Kimwe mu bituma umuziki wa Gozbert ukomeza gukundwa ni uburyo yandika indirimbo zishingiye ku buzima busanzwe, ibigeragezo, gushimira Imana, kwizera no gukomeza kugira ibyiringiro.
Mu kiganiro yagiranye n’itangazamakuru, Gozbert yigeze kuvuga ko umuziki we ukunze guturuka ku byamubayeho no ku buzima yanyuzemo. Yagaragaje kandi ko mu ndirimbo ze zose, “Shukrani” ari imwe mu ndirimbo zifite umwanya wihariye kuri we, kuko yayifashishije mu kuvuga byinshi ku buzima bwe no gushimira Imana.
Iyi ni imwe mu ngingo igaragara mu nganzo ye: gukoresha inkuru n’ibibazo umuntu ashobora guhura na byo mu buzima, hanyuma akabihuza n’ubutumwa bw’ukwizera n’ibyiringiro.
Indirimbo zamuhesheje izina muri Afurika y’Iburasirazuba
“Ipo Siku” ni imwe mu ndirimbo zamamaje Goodluck Gozbert cyane. Yaje gukurikirwa n’izindi ndirimbo zakunzwe zirimo “Acha Waambiane”, “Wastahili Sifa”, “Shukurani”, “Kama Si Wewe”, “Hauwezi Kushindana” na “Mwenye Majibu”.
Mu bihangano bye kandi harimo “Simu”, “Hasara Roho”, “Umeshinda Yesu”, “Mama”, “Pendo Langu”, “Nipe”, “Nyakati”, “Mungu Hapokei Rushwa” na “Nibadilishe”, bigaragaza ubwinshi bw’insanganyamatsiko akoraho mu muziki we.
Mu bihe bya vuba, Gozbert yakomeje guteza imbere umushinga wa “Reborn Experience”. Album “Reborn Experience” yasohotse mu 2025 ifite indirimbo 10, mu gihe “Reborn Experience Season 2” na yo yasohotse mu 2025 ikagira izindi ndirimbo 10.
Muri “Reborn Experience Season 2” harimo indirimbo nka “Narudisha Sifa”, “Nikuabudu”, “Yesu Nakupenda”, “Saimoni”, “Yote Maisha”, “Nimekusamehe”, “Yote Kwa Yesu”, “Pambana”, “Usitafute Kueleweka” na “Mwema”.
“Narudisha Sifa” na yo yabaye imwe mu ndirimbo ze zagaragaje ko Gozbert akomeje kugira abafana benshi mu karere; ku rubuga rwe rwa YouTube, amashusho y’iyi ndirimbo yari amaze kurebwa inshuro zirenga miliyoni ebyiri mu makuru agaragara ku rubuga rwe.
Afite ibihembo byo ku rwego rwa Afurika y’Iburasirazuba
Ubwamamare bwa Goodluck Gozbert ntibugarukira ku ndirimbo ze gusa, kuko yagiye anahabwa ibihembo bitandukanye.
Mu 2015, yegukanye igihembo cy'umuhanzi mwiza mu Karere ka Afrika y'Uburasirazuba (Male Artist of the Year for East Africa) muri Sauti Awards, ndetse muri uwo mwaka anegukana Best Gospel Artist/Song of the Year muri Xtreem Awards.
Mu 2019, yahawe kandi igihembo cy'umuhanzi mwiza w'umugabo muri Afrika (Best Male Minister–Africa) muri Maranatha Awards Eastern Africa.
Ibihembo n’ibikorwa bye byamufashije gukomeza kumenyekana mu bihugu bitandukanye byo muri Afurika y’Iburasirazuba, aho indirimbo ze zagiye zigera ku bantu batari muri Tanzania gusa.
Ku bijyanye n’umuziki wa Gospel, Gozbert yagiye asobanura ko kuwukora abifata nk’umurimo n’uburyo bwo kugeza ubutumwa ku bantu, aho kuwushyira ku mbuga nkoranyambaga n’izindi nzira zikoresha ikoranabuhanga bigamije gutuma ubwo butumwa bugera kure.
Ibi bigaragara no mu bikorwa bye bya vuba, aho yakomeje gukoresha indirimbo n’imishinga ya “Reborn Experience” mu gutanga ubutumwa bwo kwizera, gushima Imana, kwihangana no gukomeza kwizera n’igihe umuntu ari mu bihe bikomeye.
Ni muri uwo murongo kandi indirimbo “Bado Hujafika Mwisho”, iri kuri “Reborn Experience”, yakomeje kwitabwaho kubera ubutumwa bwayo bwo kwibutsa umuntu uri mu bihe bikomeye ko ubuzima bwe butararangira kandi ko hakiri ibyiringiro. Mu Nzeri 2026, hasohotse na none uburyo bw’amashusho y’iyi ndirimbo.
Goodluck Gozbert agiye guhurira na Dana Morey mu ivugabutumwa muri Tanzania
Goodluck Gozbert ni umwe mu bahanzi bazifatanya na Dr. Dana Morey mu biterane bya “A Light to the Nations”, umuryango ukora ibikorwa by’ivugabutumwa mu bice bitandukanye by’isi, cyane cyane muri Afurika.
Ku rubuga rwawo, A Light to the Nations igaragaza Dana Morey nk’uwashinze uyu muryango. Ni ibiterane akorera hirya no hino ku Isi ari kumwe na Pastor Dr. Ian Tumusiime uyobora uyu muryango muri Afrika [A Light to the Nations Africa Ministries].
Ibi biterane bizwi nka “ALN Miracle Gospel Celebration”, bisobanurwa mu Kinyarwanda nk’“Kwizihiza Ivugabutumwa ry’Ibitangaza”, biteganyijwe kubera mu bice bibiri bya Tanzania.
Igice cya mbere kizabera mu Mujyi wa Bariadi, ku kibuga cya CCM Bariadi, kuva ku wa 1 kugeza ku wa 4 Ukwakira 2026. Igice cya kabiri kizabera i Buhongwa muri Mwanza, ku kibuga cy’ishuri riri muri Buhongwa B, kuva ku wa 8 kugeza ku wa 11 Ukwakira 2026.
Ibiterane biteganyijwe gutangira saa Tatu za mu gitondo bikageza saa Saba z’ijoro, aho abazitabira bazahabwa umwanya wo gukurikira ubutumwa bw’ivugabutumwa, kuramya no guhimbaza Imana.
Biteganyijwe ko muri ibi biterane hazatangwa ibihembo bitandukanye mu buryo bwo gutombora, birimo inka, telefoni, moto, igare, firigo, televiziyo n’ibindi.
Dr. Dana Morey, binyuze muri A Light to the Nations, yasabye abantu bo mu bihugu bitandukanye kwitabira ibi biterane, ashimangira ko ubutumwa bwa Yesu bugenewe abantu bose. Ati: “Yesu ni uw’abantu bose!”
Yakomeje ubutumire agira ati: “Aho waba ukomoka kose cyangwa aho usengera hose, urakaza neza! Yesu yapfiriye abantu bose, kandi urukundo rwe ni urw’abantu bose.”
Yasabye abazitabira kuza bafite inyota yo gushaka Imana kandi biteguye impinduka. Ubutumwa bw’ibi biterane bushingiye ku murongo wo muri Yohana 3:16 uvuga ku rukundo Imana yakunze abari mu isi.
Goodluck Gozbert ategerejwe mu giterane cyateguwe na Ev. Dana Morey, kizabera muri Tanzania
Ev. Dana Morey agiye gukorera igiterane gikomeye mu gihugu cya Tanzania
Pastor Dr Ian Tumusiime, Umuyobozi Mukuru wa A Light to the Nations Africa Ministries
Umuvugabutumwa w'umunyamerika Dana Morey yateguye igiterane gikomeye muri Tanzania
REBA INDIRIMBO YA GOODLUCK GOZBERT