Ni umukino wabaye kuri iki Cyumweru saa yine z'ijoro ubera kuri Sitade ya Laurent Pokou.
Watangiye ikipe y'igihugu ya Misiri ariyo iri hejuru ariko abakinnyi nka Ahmed Hegazy na Hamdi Fathi bagerageza gutereka imipira mu izamu bakoresheje umutwe ariko ntibyabakundira neza.
Mu minota 14 nibwo ikipe y'igihugu ya DR Congo yatangiye kwinjira mu mukino arinako Abasore nka Yoane Wissa bagerageza uburyo imbere y'izamu.
Ikipe y'igihugu ya DR Congo yakomeje gukina iri hejuru cyane ndetse binashoboka ko yabona igitego nkaho Mechak Elie yabonye umupira mwiza azamuka yiruka yinjira mu rubuga rw'amahina ariko aho kurekura ishoti aratinda birangira bawumwatse.
Ku munota wa 37 Mechak Elia w'ikipe y'igihugu ya DR Congo yafunguye amazamu ku mupira mwiza ena Yoane Wissa.
Kuwa 43 ikipe y'igihugu ya Misiri yaje kubona penariti ku ikosa myugariro wa DR Congo Batubinsika yarakoreye Ahmed Hegazy amukubitira inkokora mu rubuga rw'amahina.
Yahise iterwa na Mostafa Mohammed ayitereka mu nshundura igitego cyo kwishyura kiba kirabonetse.
Amakipe yombi yagiye kuruhuka anganya igitego 1-1. Igice cya kabiri cyatangiye Ikipe y'igihugu ya DR Congo isatira cyane ishaka igitego cya 2.
Ku munota 52 Cedric Bakambu yaratsinze igitego ku mupira yarahawe na Mechak Elia ariko umupira unyura hepfo y'izamu gato cyane.
Ikipe y'igihugu ya DR Congo yakomeje kurusha Misiri ariko ntibigire icyo bitanga ngo babone igitego.
Kuwa 84, Mahmoud Hamada wa Misiri yarase igitego kidahushwa ku mupira yarahawe na Zizo imbere y'izamu ariko agiye gutera ishoti aranyerera aragwa.
Iminota 90 y'umukino yarangiye amakipe yombi anganya igitego 1-1 bituma hitabazwa iminota 30 y'inyongera.
Mu nyongera ikipe y'igihugu ya Misiri yaje ihura n'ibibazo ku munota wa 96 , umukinnyi wayo Mohammed Hamdi ahabwa ikarita ya kabiri y'umuhondo ku ikosa yakoreye Simon Banza bihita bibyara ikarita y'umutuku.
Ikipe y'igihugu ya DR Congo yabonye uburyo bw'inshi ariko Misiri y'abakinnyi 10 ikomeza kwirwanaho iminota y'inyongera irangira bakinganya igitego 1-1.
Kuri penariti,byaje kurangira ikipe y'igihugu ya DR Congo itsinze penariti 8-7 ihita yerekeza muri 1/4.
Mbere yuko uyu mukino uba,saa moya zuzuye ikipe y'Igihugu ya Guinuea yari yakatishije itike ya 1/4 itsinda Guinea Equatorial igitego 1-0.
Ikipe y'igihugu ya DR Congo yerekeje muri 1/4
