ADEPR yavuze ku kuba itarasezeranyije Vestine n’umugabo we Idriss

Yabigarutseho kuri uyu wa Kabiri tariki 2 Ukuboza 2025, mu kiganiro n’itangazamakuru cyagarutse ku rugendo rw’imyaka 85 ishize Itorero ADEPR rimaze ribonye izuba, ibikorwa by’ivugabutumwa n’isanamitimana byakozwe muri uyu mwaka uri kugana ku musozo, amabwiriza mashya bashyizeho ku baririmbyi n’ibindi.

Muri iki kiganiro, Pasiteri Ndayizeye Isaïe yabajijwe ku makuru yasakaye ku mbuga nkoranyambaga ajyanye n’uko Ishimwe Vestine uririmbana na Dorcas atemerewe guhamya isezerano rye n’umukunzi we mu Itorero ADEPR.

Yabajijwe ibi mu gihe amezi ane ashize Vestine asezeranye imbere y’Imana n’umukunzi we. Ni mu birori byabereye mu busitani bwa Intore Conference Arena i Rusororo, aho basezeranyijwe na Pasiteri Jackson Mugisha wa Spirit Revival Temple.

Byatunguye benshi kubona Vestine adasezeraniye muri ADEPR, kandi we n’abo mu muryango we barakuriye muri iri torero mu rurembo rwa Muhoza.

Mu gusubiza iki kibazo, Pasiteri Ndayizeye Isaïe yavuze ko ibyatangajwe ari ibinyoma, kuko ADEPR itigeze yima ikaze Vestine ku ruhimbi, ndetse ko nawe yatunguwe mu minsi ishize ubwo yabonaga uwiyita Pasiteri agaruka kuri iyi ngingo.

Pasiteri Ndayizeye Isaïe yashimangiye ko atarahura na Vestine Ishimwe imbona nkubone, ndetse ko atigeze amwakira mu biro bye. Ati: "Ibyo ni ikinyoma! Nigeze numva n'umuntu wiyita umupasiteri wabivuze (ho) mbega akora inkuru yose, ibyo yavuze byose yarambeshyeye. Vestine nta n'ubwo ndahura nawe, mvuze ngo yaje mu biro byanjye […]”

Yavuze ko ADEPR itigeze yanga gusezeranya abantu, kuko ishyigikiye ibaho ry’umuryango. Akomeza agira ati “Uretse ko nta n'ubwo twanga gusezeranya abantu, tubagira inama, turabaganiriza, dukunda urubyiruko, dukunda umuryango.”

Yavuze ko ku mbuga nkoranyambaga hakozwe ibiganiro byinshi bigamije kumvikanisha ko Ishimwe Vestine yasubijwe inyuma n’itorero ADEPR, ariko ngo igihe kirageze ko bashungura ibyo babona ndetse n’ibitangazwa, bakamenya ukuri.

Ati: “Umuntu wese wabivuze muri ubwo buryo rero muzabanze mushake murebe ko hari n'ikindi kintu kizima ajya avuga. Mbega nimubona umuntu wagiye ku karubanda agakora inkuru y'ikinyoma kandi rwose ashishikaye muzabanze murebe ko hari n'izindi yakoze, murebe ko hari n'izindi nzima ajya avuga [...]"

Yibukije abanyamakuru gushyira imbaraga cyane mu gukora no gutangaza inkuru nziza zifasha sosiyete, kuko hari ibihimbano byinshi abantu bizera kandi atari ukuri.

Ati "[...] Ntimukajye mutinda ku bantu batagira ibintu bizima, ahubwo mujye muhitamo kuvaga ibintu bizima. Kuko hari igihe usanga n'abantu bakurikira izo nkuru z'ibinyoma, kuko namwe mutafashe umwanya wo kubwira abantu ibibubaka. Dukeneye gufasha umuryango nyarwanda kubona inkuru nziza zivugwa."

Umushumba Mukuru w'Itorero rya ADEPR, Pasiteri Ndayizeye Isaïe yahinyuje ibyavuzwe ko ADEPR yanze gusezeranya Ishimwe Vestine n’umukunzi we Idrissa

Ishimwe Vestine yasezeranye imbere y’Imana n’umukunzi we Idriss wo muri Burkina Faso, mu birori byabereye mu Intare Conference Arena ku wa Gatandatu tariki 5 Nyakanga 2025

Ku itariki nk'iriya, ni nabwo Idriss yasabye anakwa umukunzi we Ishimwe Vestine nyuma y'umwaka wari ushize bari mu munyenga w'urukundo

REBA KU ISAHA N’UMUNOTA UMWE (1:01:19’) PASITERI NDAYIZEYE AVUGA KURI VESTINE URIRIMBANA NA DORCAS