Yabakiriye kuri uyu wa Gatandatu mbere y’uko iyi kipe ikina na RS Berkane mu mukino wo kwishyura wa 1/4 cya CAF Champions League kuri iki Cyumweru saa kumi n'ebyiri muri Stade Amahoro.
Aba bayobozi ba Al Hilal SC yo muri Sudani bari barangajwe imbere n’Umuyobozi Mukuru w’iyi kipe, Hisham Hassan Al-Soba'at, ari kumwe n’Umuyobozi Wungirije ushinzwe ibijyanye na siporo, Eng. Muhammad Ibrahim Al-Alaiki; Umubitsi Alim Al-Din Muhammad Abdullah; Umuyobozi ushinzwe imibanire Fadel Hussein Abdul Samad, n’Umuyobozi wungirije muri uru rwego, Haitham Hassan Al-Soba'at.
Perezida wa FERWAFA yagaragaje ko Abanyarwanda bishimira gushyigikira Al Hilal mu mikino mpuzamahanga ihuza amakipe yo ku mugabane wa Afurika. Yayifurije intsinzi kuri uyu munsi anashimangira ko u Rwanda ruzakomeza kuyiba hafi muri uru rugendo.
Abayobozi ba Al Hilal SC yo muri Sudani ikina muri shampiyona y’u Rwanda nyuma y’uko iwabo hariyo ikibazo cy’umutekano mucye banakoreye urugendo mu nyubako za FERWAFA, basura ibikorwaremezo n’ibikoresho bifasha mu guteza imbere umupira w’amaguru mu Rwanda.
Perezida wa Al Hilal yashimiye cyane Abanyarwanda muri rusange n’abakunzi b’iyi kipe by’umwihariko ku buryo bakomeje kubafasha no kubitaho, cyane cyane mu marushanwa nyafurika.
Yanashimiye by’umwihariko Perezida wa FERWAFA ku ruhare rwe mu gutuma ibikorwa bya Al Hilal bigenda neza mu Rwanda, ashimangira ko batazigera bibagirwa ubufasha n’ubufatanye bahawe n’u Rwanda, avuga ko bizahora byanditse mu mateka no mu mitima y’abazabakomokaho.
Abayobozi bakuru ba Al Hilal bashimangiye ko batazibagirwa ubufasha bahawe n'u Rwanda