Abaturage ntibemerewe kwitabira! Samia Suluhu Hassan agiye kurahirira kuyobora Tanzania

Nk’uko byatangajwe na Jacobs Mwambegele, ukuriye Komisiyo y’Igihugu y’Amatora (INEC), Samia Suluhu Hassan ni we watsinze amatora rusange yabaye ku wa 20 Ukwakira 2025, ahagarariye ishyaka riri ku butegetsi, CCM.

Yatsinze amatora ku majwi 97.66%, bikaba ari yo ntsinzi ikomeye kurusha izindi zose zabayeho mateka ya Tanzania. Ku baturage miliyoni 37 biyandikishije ku ilisiti y'itora, miliyoni 31 ni bo bamutoye, nk’uko byatangajwe na INEC.

Nubwo amatora yaranzwe n’imvururu mu bice bimwe na bimwe birimo Dar es Salaam, aho hashyizweho guma mu rugo, INEC yatangaje ko 87% by’abaturage bitabiriye amatora, igipimo cyisumbuye cyane ugereranyije n’imyaka yabanje.

Abaturage ntabwo bemerewe kwitabira ibirori byo kurahira

Nk'uko byatangarijwe kuri Televiziyo y’igihugu kuri TBC, ibirori byo kurahira biteganyijwe kuri uyu wa Mbere biritabirwa n’abayobozi bakuru baturutse mu bihugu bitandukanye ariko abaturage ntabwo bemerewe kubyitabira kubera impamvu z’umutekano. Televiziyo y’igihugu TBC niyo iri bwerekane ibirori mu buryo bw’imbona nkubone.

Mu batumirwa bitezwe muri uyu muhango, harimo na Perezida Evariste Ndayishimiye w’u Burundi, wamaze gufata rutemikirere agana i Dodoma, nk’uko byemejwe n’ibiro bye.

Perezida Samia Suluhu Hassan wagiye ku butegetsi bwa Tanzania mu 2021 asimbuye nyakwigendera John Pombe Magufuli, agiye gukomeza kuyobora iki gihugu mu myaka itanu iri imbere.

Samia Suluhu Hassan agiye kurahirira kuyobora Tanzania