Iri rushanwa rihuza amakipe agizwe n'abantu bakora imirimo isanzwe nk'abarimu, abaganga, abanyeshuri n'abahinzi, bahatanira kugera ku mikino ya nyuma ku rwego rw'igihugu. Ryatangiriye mu gace ka Rongjiang mu ntara ya Guizhou, ariko ubu rimaze gukwira mu turere dusaga 60 two hirya no hino mu Bushinwa.
Mu karere ka Fuping, intara ya Hebei, ibihumbi by'abaturage byitabiriye umukino wa nyuma wabaye ku wa Gatandatu, aho ikipe y'iwabo yatsinze igitego 1-0, ikabona itike yo kujya mu mikino ya nyuma izabera i Guizhou muri Kanama.
Abategura iri rushanwa bavuga ko ritagamije imyidagaduro gusa, ahubwo rifasha kuzamura ubukungu bw'uturere. Ku munsi umwe w'umukino utangiza shampiyona, ibikorwa by'ubucuruzi byinjije amafaranga arenga 200,000 yuan (hafi ibihumbi 28 by'amadolari ya Amerika), mu gihe abacuruzi bavuga ko imikino yabongereye abakiriya.
Iri rushanwa kandi ryagaragaye nk'igisubizo ku bafana batishimiye ibibazo byugarije umupira w'amaguru w'ababigize umwuga mu Bushinwa, harimo ruswa n'imicungire mibi yatumye amakipe menshi asenyuka. Ikipe y'igihugu y'abagabo nayo iheruka gukina Igikombe cy'Isi mu mwaka wa 2002.
Abafana bavuga ko n'ubwo Ubushinwa butari mu Gikombe cy'Isi, kureba amakipe yo mu baturage babo bibaha ibyishimo kandi bituma urubyiruko rurushaho gukunda umupira w'amaguru, bafite icyizere ko bishobora kuzatanga abakinnyi bazafasha igihugu kongera guhatana ku rwego mpuzamahanga.