Aya mahugurwa yamaze ibyumweru bitandatu, yabereye mu Kigo cya Polisi gitangirwamo amahugurwa yo kurwanya iterabwoba (Counter Terrorism Training Centre – CTTC) giherereye i Mayange mu Karere ka Bugesera.
Yateguwe ku bufatanye bwa Polisi y’u Rwanda n’Urwego rushinzwe umutekano w’imbere muri Leta ya Qatar, ruzwi nka Lekhwiya.
Nk’uko byatangajwe na Polisi y’u Rwanda, umuhango wo gusoza aya mahugurwa wabaye ku wa Kane tariki ya 23 Nyakanga, uyobowe n’Umuyobozi Mukuru wa Polisi y’u Rwanda wungirije ushinzwe ibikorwa (DIGP), CP Vincent Sano, ari kumwe na Major Nassar Khalid wari uhagarariye itsinda rya Lekhwiya ryaturutse muri Qatar.
Abitabiriye aya mahugurwa bahuguwe mu byiciro bitatu birimo kurinda abanyacyubahiro (VIP Protection), kurwanira mu mijyi no guhangana n’ibyihebe (Urban Combat), ndetse no guhosha imyigaragambyo no kugarura ituze muri rubanda (Riot Control).
Intego nyamukuru y’aya mahugurwa yari ukubongerera ubushobozi bwo guhangana n’ibibazo by’umutekano bigenda bihinduka no kubafasha gukora inshingano zabo mu buryo bw’umwuga.
Mu ijambo rye, DIGP CP Vincent Sano yashimye ubufatanye buri hagati y’u Rwanda na Qatar, avuga ko bwagize uruhare rukomeye mu guteza imbere ubushobozi bw’inzego z’umutekano z’ibihugu byombi.
Yagize ati: “Ndashimira ubuyobozi bwa Repubulika y’u Rwanda n’ubwa Leta ya Qatar ku bufatanye bwiza bukomeje kuranga ibihugu byombi, bukaba bwarahinduwe ibikorwa bifatika bigamije guteza imbere amahoro, umutekano n’ubunyamwuga.”
Yakomeje avuga ko inkunga Lekhwiya ikomeje gutanga mu guhugura abapolisi b’u Rwanda igaragaza imbaraga mu mikoranire y’impande zombi ndetse n’icyerekezo bahuriyeho cyo gutegura abashinzwe umutekano bafite ubushobozi bwo guhangana n’ibibazo bishya kandi bigenda birushaho gukomera.
CP Sano yashimiye kandi abapolisi barangije amahugurwa kubera ubwitange, imyitwarire myiza n’umuhate bagaragaje mu gihe cyose bamaze bahugurwa. Yabashishikarije gukoresha neza ubumenyi bungutse, bakarangwa n’ubunyamwuga, ubunyangamugayo ndetse n’ubwitange mu kazi ka buri munsi.
Yavuze ko Polisi y’u Rwanda izakomeza gushora imbaraga mu kongerera abapolisi ubumenyi n’ubushobozi kugira ngo bakomeze kwitegura neza guhangana n’ibibazo by’umutekano bigenda bivuka.
Umuyobozi w’Ikigo cya CTTC Mayange, Commissioner of Police William Kayitare, na we yashimiye abasoje amahugurwa ku murava bagaragaje, ababwira ko kurangiza ayo mahugurwa atari iherezo, ahubwo ari intangiriro y’inshingano zisaba ubunyamwuga burushijeho.
Yabibukije gukomeza gukurikiza no kubyaza umusaruro ibyo bize no gukomeza kwiyungura ubumenyi mu rwego rwo kurushaho kunoza akazi.
Muri aya mahugurwa, abapolisi bahawe ubumenyi butandukanye burimo kurinda abanyacyubahiro, guhangana n’ibyihebe byihishe mu nyubako zo mu mijyi, guca intege abagizi ba nabi, gukoresha intwaro no kurasa neza, guhosha imyigaragambyo ndetse no kugarura ituze muri rubanda.
Ibi kandi bigaragaza umuhate wa Polisi y’u Rwanda wo gukomeza kongerera ubushobozi abakozi bayo binyuze mu bufatanye n’ibindi bihugu, hagamijwe kubaka urwego rw’umutekano rufite ubumenyi bujyanye n’imbogamizi z’iki gihe no kurushaho kurinda umutekano w’abaturage n’ibikorwa byabo.
