Ku wa Gatanu, tariki ya 23 Ukwakira 2026, abapolisi 12 b’u Rwanda basoje aya mahugurwa yabereye ku cyicaro cy’Ishami rya Polisi y’u Rwanda rikoresha imbwa mu gucunga umutekano, rizwi nka Canine Brigade, giherereye mu Murenge wa Ndera, mu Karere ka Gasabo.
Nk’uko byatangajwe na Polisi y’u Rwanda, aya mahugurwa yatanzwe n’abarimu ba Polisi y’u Rwanda ku bufatanye n’inzobere zo mu kigo cyo mu Buholandi cyitwa The Police Dog Center Holland (PDCH).
Yari agamije guha abapolisi ubumenyi ngiro n’ubushobozi bwo kumenyera imbwa nshya no gukorana na zo mu buryo bwa kinyamwuga, kugira ngo zifashishwe neza mu bikorwa bitandukanye bigamije kurinda umutekano.
Mu masomo bahawe harimo gusaka ibinyabiziga n’imizigo, gusaka inyubako, gushakisha ibiyobyabwenge n’ibiturika ahantu hatandukanye, harimo n’ahantu hatari mu nyubako.
Umuhango wo gusoza aya mahugurwa wayobowe na Komiseri w’Ishami rya Polisi y’u Rwanda rishinzwe ibikorwa n’ituze rusange, Commissioner of Police (CP) George Rumanzi.
Yashimangiye ko kugira ubumenyi bwo gukoresha imbwa bidahagije, ahubwo ko abapolisi bazikoresha bagomba no kugira imyitwarire myiza, kuzitaho no guha agaciro imibereho yazo kugira ngo zishobore kuzuza inshingano zazo.
Yagize ati: “Kuba ufite ubumenyi n’ubushobozi bihagije ibyo ubwabyo ntibihagije. Ugomba no kugira imyitwarire myiza no kwita kuri izi mbwa uko bikwiye. Kugira ngo tubashe gusohoza inshingano zo gucunga umutekano w’abaturage bacu n’igihugu cyacu, no kubona umusaruro w’ibyo twakoze, tugomba kwita kuri izi mbwa.”
CP George Rumanzi yavuze ko Polisi y’u Rwanda izakomeza kongera ubushobozi mu gukoresha imbwa binyuze mu mahugurwa no mu bufatanye n’abafatanyabikorwa batandukanye.
Yongeyeho ko hateganywa n’amahugurwa agenewe abahugura abandi, agamije kongerera igihugu ubushobozi bwo gutanga amahugurwa y’abapolisi bakoresha imbwa mu bikorwa byo gucunga umutekano.
Yagize ati: “Mwatweretse ko koko tugeze ku rwego rwiza rw’ubumenyi n’ubushobozi mu mahugurwa. Icyakora, amahugurwa ahora akomeza, kandi nshimishijwe no kubamenyesha ko tuzakomeza gukorana n’abafatanyabikorwa bacu kugira ngo hatangwe n’amahugurwa agenewe abahugura abandi.”
Umuyobozi w’Ishami rya Polisi y’u Rwanda rikoresha imbwa mu gucunga umutekano, Assistant Commissioner of Police (ACP) Faustin Kalimba, yavuze ko aya mahugurwa yari agamije guha abapolisi ubumenyi ngiro n’ubushobozi bukenewe kugira ngo bakorane n’imbwa mu buryo bwa kinyamwuga.
Yashimiye ubuyobozi bwa Polisi y’u Rwanda ku nama, ibikoresho n’ubundi bufasha bwatumye aya mahugurwa agenda neza. Yashimiye kandi inzobere zo mu kigo cya PDCH ku bumenyi n’ubunararibonye zasangije abapolisi bayitabiriye.
ACP Faustin Kalimba yasabye abasoje amahugurwa gukomeza kwiyungura ubumenyi, gukora ubushakashatsi no gukurikirana impinduka zigaragara mu bijyanye n’iterabwoba n’ibindi byaha bishobora guhungabanya umutekano, kugira ngo barusheho kubikumira no kubirwanya.
Aya mahugurwa yo kumenyereza abapolisi imbwa nshya ziherutse kugurwa yatewe inkunga n’Ikigo cy’Igihugu gishinzwe Ibibuga by’Indege, Rwanda Airports Company (RAC), ku bufatanye n’abarimu bo muri PDCH yo mu Buholandi.
Ni igikorwa kigamije gukomeza kongerera Polisi y’u Rwanda ubushobozi mu gukoresha imbwa mu bikorwa by’umutekano, binyuze mu kongera ubumenyi bw’abazikoresha no kunoza imikoranire hagati yabo n’izo mbwa.
