Abanyarwenya 11 bategerejwe i Kigali mu iserukiramuco ry’ibyumweru bitatu

Iri serukiramuco rizahuza abanyarwenya bo mu Rwanda, u Burundi, Repubulika Iharanira Demokarasi ya Congo, Uganda, Guinee Conakry na Kenya, rikazabafasha gusangira ubunararibonye no guteza imbere impano zabo mu buryo bw’umwuga.

Rizagaragaramo: Babu, Prince, Cotilda, Doug Mutai, Bappa Oumar, Kigingi, Rusine, Uncle Mo, Alain Esongo, Herve Kimenyi, na Muhinde

Rizabera Norrsken ku wa 17 Ukwakira 2025; Institut Français i Kigali ku wa 23-24 Ukwakira 2025, ndetse na Kigali Universe, ku wa 30-31 Ukwakira 2025

Michael Sengazi, umwe mu bategura iri serukiramuco, yabwiye InyaRwanda iri serukiramuco rizaba ari ridasanzwe ku rugendo rwabo.

Yagize ati "Ni ubwa mbere hazaba ‘festival y’ibyumweru bitatu’ mu rwego rwa Comedy. Tuzakora ku wa Kane no ku wa Gatanu, ahantu hatandukanye, kandi abanyarwenya bazakora ‘specials’ z’iminota 30 zo ku rwego mpuzamahanga. Nta gusondeka, bazakora iminota ihagije kandi myiza, kugira ngo abakunzi b’ikinamico baryoherwe."

Akomeza avuga ko iri serukiramuco ritazibanda gusa ku mwuga w’abanyarwenya, ahubwo hazanazerekanirwa ibihangano by’abandi bahanzi barimo abanyamideli, abanyabugeni n’abandi bafite impano, bityo rikaba urubuga rwagutse rwo kugaragaza impano zitandukanye ziri mu karere.

Iri serukiramuco ryatangijwe bwa mbere mu 2019 rigamije gutanga umunezero no kuzamura impano z’abanyarwenya bashya, rikanabahuza n’abamaze kumenyekana no gukomera mu mwuga wabo. By’umwihariko, rikunze kwibanda ku bihugu byo mu karere nka Rwanda, u Burundi na Repubulika Iharanira Demokarasi ya Congo.

Kubera ko abanyarwenya bazakora mu ndimi zitandukanye harimo Ikinyarwanda, Igifaransa n’Icyongereza, abakunzi b’ikinamico ‘bose bazaryoherwa’.

Uretse ibyo, abategura iri serukiramuco bavuga ko iyi nshuro izaba irenze ku buryo busanzwe, aho buri mwanya uzaba ari umwihariko, ukurikije imiterere y’umunyabugeni cyangwa uko umunyarwenya ugaragara.

Michael Sengazi yavuze ko ibi bizatuma abitabira bahura n’ibyiza byinshi, birimo kumva Comedy y’umwimerere, kubona imideli, ubuhanzi bwo ku rwego mpuzamahanga, ndetse n’uburyo abanyarwenya bahuriza hamwe imbaraga zabo mu guhanga udushya.

Yongeyeho ko iri serukiramuco rizafasha cyane mu guteza imbere ubuhanzi bwo mu karere, bikazatuma abanyarwenya bashya babona icyizere cyo gukomera mu mwuga wabo.

Iri serukiramuco ni amahirwe ku bakunzi b’ikinamico n’abandi bafite impano, rikaba urubuga rwagutse rwo gusangira, kwidagadura no kwerekana impano z’akarere ku rwego mpuzamahanga. 

Hatangajwe abanyarwenya 11 bazaseruka mu iserukiramuco ‘Caravane du Rire’ rigiye kubera i Kigali 

Umunyarwenya Rusine Patrick ari mu bategerejwe muri iri serukiramuco

Umunyarwenya Muhinde wamamaye muri Gen-z Comedy ategerejwe muri 'Caravane du Rire' 

Umunyarwenya akaba n'umuhanzi, Prince yongeye gutumirwa muri iri serukiramuco 

Umunyarwenya Michael Sengazi yatangaje ko kuri iyi nshuro iri serukiramuco rizaba mu gihe cy’ibyumweru bitatu

Abanyarwenya mpuzamahanga barimo: Bappa Oumar Doug Mutai, Cotilda, Uncle Mo, Alain Esongo n’abandi bategerejwe i Kigali