Mu gihe amakipe akomeje kwiyubaka mu buryo budasanzwe, ayo muri Esipanye nayo arakataje muri iyi gahunda. Iyo bavuze Shampiyona ya Esipanye "Laliga Santander", benshi bumva Real Madrid na FC Barcelona.
Kugeza ubu Real Madrid yamaze kwibikaho rutahizamu ukomoka mu Bufaransa Kylian Mbappe, abafana ba FC Barcelona batangira kugiramo ubwoba.
Nubwo Real Madrid yasinyishije Mbappe, na FC Barcelona iri mu rugamba rwo kugura umunya Esipanye Nico Williams ukinira Athletic Bilbao kugira ngo yongere imbaraga zizahangana na Real Madrid mu mwaka w'imikino utaha wa 2024-25.
Athletic Bilbao irifuza Miliyoni 58£ kugira ngo irekure uyu mukinnyi, abafana ba FC Barcelona basa n'aho bakiriye ko azabakinira mu mwaka w'imikino utaha wa 2024-25.
Rivaldo VÃtor Borba Ferreira wamamaye muri FC Barcelona, yavuze ko Barca niramuka yegukanye Nico Williams, ibyo kuba Real Madrid yarasinyishije Mbappe ntacyo bizaba bikivuze imbere ya FC Barcelona. Ati "Icyo nakwibutsa FC Barcelona ni uko igomba kwihutisha gahunda yo kugura Nico Williams. Nibiramuka bikunze, izaba ari intambwe nziza Barcelona iteye.
Barcelona yamye ari ikipe ihangana na Real Madrid, kandi iracyakeneye kubikora. Niramuka ibonye Williams ntimuzagire ubwoba bwa Mbappe, kubera ko n'ubundi Real Madrid yatunze abakinnyi beza kurusha Mbappe kandi ntabwo byabujije Barcelona guhangana".
Nubwo FC Barcelona ifite gahunda yo kugura Nico Williams ukinira Athletic Bilbao, nta biganiro byimbitse birabaho hagati y'impande zombi, byakwemeza neza niba uyu mukinnyi koko azajya muri FC Barcelona.
Nico Williams ni umwe mu bakinnyi bafashije ikipe y'igihugu ya Esipanye gutwara Euro ya 2024 batsinze u Bwongereza ku mukino wa nyuma ibitego bibiri kuri kimwe.
Rivaldo VÃtor Borba Ferreira wabaye umunyabigwi wa FC Barcelona yavuze ko nubwo Real Madrid yazanye Mbappe bidakwiye gutera Barca ubwoba
Rivaldo VÃtor Borba Ferreira yasabye FC Barcelona kwihutisha gahunda yo kugura Nico Williams