Mu gihe abanyeshuri bari mu biruhuko, inzobere mu mibanire y'abantu zirashishikariza ababyeyi n'abana gukoresha iki gihe mu kuganira no gukomeza kubaka umuryango, aho buri wese ahabwa umwanya wo gutanga ibitekerezo no kumvana.
Ibi byagarutsweho mu kiganiro Amahumbezi cya RBA, cyibanze ku ruhare rw'ababyeyi n'abana mu kubaka umubano mwiza mu gihe cy'ibiruhuko. Muri iki kiganiro, hagaragajwe ko gusangira ku meza no gushyira telefoni ku ruhande bitanga umwanya wo kuganira ku bibazo byugarije umuryango no gushakira hamwe ibisubizo.
Inzobere zivuga ko ibiruhuko bitagomba kuba igihe abana bamara umunsi wose kuri telefoni cyangwa ku mbuga nkoranyambaga, ahubwo ko ari amahirwe yo kongera kwegerana n'ababyeyi. Zisobanura ko ibiganiro byo mu muryango bifasha abana kwisanzura, kuvuga ibibahangayikishije no guhabwa ubujyanama bubafasha gufata imyanzuro myiza.
Ibi bihura n'ubutumwa bw'inzego zitandukanye zita ku mibereho myiza y'abana, zirimo UNICEF, zigaragaza ko umwanya ababyeyi baha abana babo ari kimwe mu bintu by'ingenzi bibafasha gukurira mu muryango utekanye kandi ubarinda ingaruka z'ihohoterwa n'izindi ngeso mbi.
Bamwe mu babyeyi bavuga ko nubwo akazi kabatwara umwanya, bagerageza kugenera abana igihe cyo kuganira na bo buri munsi. Ku ruhande rw'abana, bavuga ko bishimira igihe bumvwa n'ababyeyi kuko bibafasha kubabwira ibibazo bahura na byo no kubagisha inama.
Umubyeyi witwa Nyurarukundo Chantal yagize ati: "Iyo abana bari mu biruhuko, tugerageza kurya dusangiye nimugoroba, tugashyira telefoni ku ruhande. Muri uwo mwanya tubabaza uko umunsi wagenze n'ibyo bifuza. Twabonye ko bituma batwisanzuraho kandi tukamenya ibibazo bafite hakiri kare."
Undi witwa Habiyambere Dominique na we yagize ati: "Nubwo akazi kadutwara umwanya, twiyemeje nibura kugira iminota mike buri munsi yo kuganira n'abana. Twasanze kubatega amatwi bibafasha kutwiyumvamo no kutugirira icyizere."
Ku ruhande rw'abana, bavuga ko bishimira igihe ababyeyi babatega amatwi bakabaha umwanya wo kwisanzura. Bagaragaza ko iyo baganirijwe neza bibafasha kubwira ababyeyi ibibazo bahura na byo no kubagisha inama, bikarushaho kubaka icyizere n'umubano mwiza mu muryango.
Umwana witwa Byiringiro Prince yagize ati: "Iyo mama na papa bansabye kubaganiriza aho kunyihanangiriza gusa, numva nisanzuye. Iyo mfite ikibazo mbabwira uko kimeze, bakangira inama aho kuntuka."
Undi witwa Cyuzuzo Aline yagize ati: "Mu biruhuko twifuza ko ababyeyi baduha umwanya wo kuganira no gukina natwe. Iyo turi kumwe bituma twumva twitaweho kandi tukabasha kubabwira ibitugora ku ishuri no mu buzima busanzwe."
Mu gihe abanyeshuri batangiye ibiruhuko bisoza umwaka w'amashuri, Minisitiri w'Uburezi, Joseph Nsengimana, yabasabye kubikoresha neza baruhuka kandi basabana n'imiryango yabo.
Minisitiri yabibukije ko nubwo bari mu biruhuko, bakwiye gukomeza kurangwa n'indangagaciro zirimo ikinyabupfura, isuku, kubaha abandi no gukunda umurimo.
Yasabye kandi ababyeyi n'abarezi gukomeza gufasha abana, kubatega amatwi no kubatoza imyitwarire myiza kugira ngo ibihe by'ibiruhuko bibagirire akamaro mu mikurire yabo.
Inzobere zitandukanye zisaba imiryango gukoresha neza ibiruhuko, ikirinda amakimbirane ahubwo ikimakaza ibiganiro, gusangira no gukorera hamwe ibikorwa bituma umubano urushaho gukomera.
Mu bihe bitandukanye, abana na bo bagiye bagaragaza ko bifuza ko ababyeyi bababonera umwanya wo kuganira na bo, cyane cyane mu biruhuko.
Ku ruhande rw'abana, basabwa gukoresha neza igihe cy'ibiruhuko birinda ibikorwa bishobora kubagiraho ingaruka mbi. Basabwa gukomeza kwiga no gusubiramo amasomo, gufasha imiryango yabo mu mirimo iboneye, kugira isuku, kubaha ababyeyi n'abandi bantu babakikije.
Bakangurirwa kandi gukoresha neza ikoranabuhanga, birinda kumara igihe kinini kuri telefoni no ku mbuga nkoranyambaga, ahubwo bagakoresha igihe bafite mu kwiga ubumenyi bushya, gusabana n'imiryango yabo no kugira uruhare mu bikorwa bibateza imbere.
Abana kandi basabwa kuganira n'ababyeyi babo igihe bahuye n'ikibazo, aho kugumana ibibazo bishobora kubangiza cyangwa gushakira ibisubizo ahantu hatizewe.