Abakora filime Nyarwanda bagiye kurahura ubumenyi muri Korea na Uganda -AMAFOTO

Izi gahunda zombi zitanga icyizere cyo gutuma uruganda rwa sinema mu Rwanda rubasha gukora filime zigezweho, zinashobora guhangana ku isoko mpuzamahanga.

Umuyobozi w'Inama y'Igihugu y'abahanzi, Marie France Niragire, yabwiye InyaRwanda ko aya mahirwe abaye intambwe ikomeye mu kurushaho guteza imbere ubuhanzi mu Rwanda, cyane cyane uruganda rwa filime.

Abari muri Korea – Busan: Gusobanukirwa uburyo bugezweho bwo gutegura film

Itsinda ry’abanyarwanda umunani barimo Tuyisenge Aimé Valens, Nyiramana Umuhire Iness, Umuhire Alain Gilbert, Uwizeye Uwera Annette, Urusaro Kalimba Sharon, Dusabimana Israel, Muhorakeye Françoise, na Dusabejambo Marie Clémentine bari mu rugendoshuri muri Busan, Korea y’Epfo.

Iyi gahunda iri gukoranwa n’imikoranire y’inzego zirimo KOICA, Minisiteri y’Urubyiruko ndetse n’Iterambere ry’Ubuhanzi, Inama y’Igihugu y’Abahanzi (Rwanda Arts Council), na Rwanda Film Federation.

Uyu mwitozo ugaruka cyane ku byiciro bibiri by’ingenzi mu ikorwa rya film: Pre-production (itegurwa rya filime) na Production (ikorwa ryayo). Ibi ni ibice bikunze kwirengagizwa cyangwa gukorwa ku rwego rudahagije mu Rwanda, nyamara ari bwo shingiro ry’uko filime igerwaho neza ku rwego mpuzamahanga.

Abari muri Busan kandi bazasura ibigo bikomeye bikora filime, bizwi nka “maison de production”, barebe uburyo zitunganywa hifashishijwe ikoranabuhanga n’inzego ziteye imbere. Hazanigwa uburyo bwo gukora film zishingiye ku muco n’ubuvanganzo nyarwanda kugira ngo “filime zacu zirusheho kugira umwihariko” nk’uko bivugwa na Niragire Marie France.

Ntibigarukira aho, kuko abagiye bazahabwa amahirwe yo guhura n’abandi bakora filime ku rwego mpuzamahanga, bagasangira ubunararibonye ndetse no kureba uburyo bashobora gukorana.

Bazanasura ibyiza nyaburanga bya Korea no kureba uko bakoresha ikoranabuhanga mu guteza imbere ubukerarugendo, ibintu bizafasha no gutekereza uko ibyakoreshwa mu Rwanda mu guteza imbere gahunda ya “Visit Rwanda”.

Abari muri Uganda: Guhuza sinema n’isoko rigezweho rya Online Market

Mu gihe abandi bari mu gice cy’itegurwa no kwagura ubumenyi, itsinda ry’abandi banyarwanda bane barimo Mugisha James, Dusabimana Appolos, Mugeni Clarisse, na Akimana Clovis bo bari muri Uganda aho bitabiriye ‘Festival’ ibera i Kampala yibanda ku kumurika isoko rya sinema hakoreshejwe ikoranabuhanga.

Iyi gahunda iterwa inkunga na UNESCO, yibanda ku bihugu bigize Afurika y’Iburasirazuba. Iri soko ry’amafilimi rishingiye ku buryo bushya bwo gucuruza no kugeza film ku baguzi binyuze kuri ‘online platforms’, nk’uko bikorwaho na Netflix n’izindi.

Niragire ati “Binyuranye no gushyira filime kuri YouTube gusa. Iri soko ryitezweho gutuma abanyarwanda bakora filime babasha kuyagurisha, bagakuramo inyungu ndetse bagakomera ku isoko ryo muri Afurika.”

Marie France Niragire avuga ko iyi gahunda ifite akamaro gakomeye ku ruganda rwa sinema mu Rwanda, kuko irazazamura ireme rya filime, ikazanira abahanzi isoko mpuzamahanga, bityo ubuhanzi bugatanga umusanzu ufatika mu bukungu bw’igihugu.

Yagize ati: “Niba dushoboye gutegura filime ku rwego rwo hejuru, tukagira n’isoko twayicururizaho, sinema yacu izazamuka, kandi igihugu cyunguke cyane mu bukerarugendo, umuco ndetse n’ubukungu muri rusange.”

Icyizere ku ruganda rwa sinema nyarwanda

Izi ngendo zombi zigaragaza isura nshya y’aho sinema nyarwanda ishobora kugana mu gihe cy’ahazaza. Binyuze mu bufatanye n’inzego zitandukanye, ndetse no gukorana n’ibihugu byateye imbere mu buhanzi, uruganda rwa filime mu Rwanda ruri ku rugendo ruba rushya rwo kuba icyitegererezo muri Afurika.

Nubwo urugendo rukiri rurerure, intambwe nk’izi zishingiye ku mahugurwa, ubufatanye, isoko ryagutse n’imikoranire n’urwego rw’ubukerarugendo, ni ingirakamaro ku buryo sinema nyarwanda ishobora kuzagera aho iba kimwe mu bisonga by’iterambere ry’igihugu – nk’uko bimeze mu bihugu byinshi byateye imbere aho ubuhanzi bugira uruhare runini muri politiki, ubukerarugendo, umuco n’ubukorikori.

Bamwe mu Banyarwanda bitabiriye urugendoshuri muri Busan, Korea y’Epfo, aho biga uburyo bugezweho bwo gutegura no gukora filime

Dusabimana Israel, Tuyisenge Aime Valens wamamaye muri filime zirimo 'Impanga' na bagenzi be basobanurirwa uburyo ikoranabuhanga rikoreshwa mu ma “studios” ya sinema yo ku rwego mpuzamahanga 

Abitabiriye amahugurwa ya KOICA baganira ku isano iri hagati ya sinema n’iterambere ry’ubukerarugendo. 

Abanyarwanda bitabiriye festival yo kumurika isoko rya filime rishingiye ku ikoranabuhanga, i Kampala muri Uganda

Izi ngendo zombi zitezweho guhindura isura ya sinema nyarwanda, mu myigire, mu micururize no mu kwagura ubufatanye

Marie France Niragire avuga ko izi gahunda ari inkingi y’ahazaza h’ubuhanzi bufasha mu bukungu n’umuco w’igihugu