Aime Uwimana, Nice Ndatabaye, Aline Gahongayire, The Ben, Clapton Kibonge, Ev. Bahavu Jannet, Micky, Nyambo Jesca, Elyse Bigira, Papi Clever na Dorcas, Tona na Favour...ni bamwe mu bamaze kugaragaza ko bafite inyota yo kuzitabira iki gitaramo cy'amateka cyiswe "Easter Jubilee Music Gathering" kizabera muri BK Arena ku wa 05 Mata 2026.
Ku wa Kabiri w'iki Cyumweru abakobwa ba Pastor Julienne Kabanda ; Blessing Teta Kabanda na Favour Tona Kabanda, batunguranye, bagaragara mu mashusho batumira abakunzi b'umuziki wa Gospel kuzitabira igitaramo cya Ben na Chance. Bati "Turashaka kubatumira kuri tarikin 05 Mata muri BK Arena mu gitaramo cyateguwe n'abakozi b'Imana Ben na Chance cyiswe Easter Jubilee".
Aba bakobwa banaciye amarenga ko nabo bazaba bari muri iki gitaramo, kuko bahamagariye abantu kuzitabira bagafatanya gutambira Imana, ibintu byumvikanisha ko nabo bazaba bahari. Favour ati: "Muzaze turamye, duhimbaze Imana, tubyine!". Teta nawe yahise yungamo ati: "See you there" [Nzababone muri BK Arena].
Ben na Chance bageze kure imyiteguro y'iki gitaramo ndetse amatike ari ku isoko. Kugura itike mbere ni bwo buryo bwiza kuko ahendutse. Amatike ya Upper Room aragura 5,000 Frw ku bayagura muri iyi minsi ya mbere y’igitaramo, mu gihe ku munsi w’igitaramo azaba agura 10,000 Frw. Amatike ya Stage View ari kugura 10,000 Frw, mu gihe ku munsi w’igitaramo azaba agura 15,000 Frw.
Amatike ya Premium aragura 20,000 Frw, aya Altar Zone aragura 25,000 Frw, aya CIP Zone aragura 35,000 Frw naho aya Executive Zone aragura 50,000 Frw. Amatike ari kuboneka ku rubuga www.ticqet.rw ndetse wanayagura ukoresheje akanyenyeri: *513*01*01#.
Ben na Chance bakunzwe mu ndirimbo "Zaburi Yanjye", "Yesu Arakora" n'izindi, bamaze imyaka 10 mu muziki usingiza Imana. Ni itsinda ry'umugabo n'umugore rikunzwe cyane mu Rwanda no hanze. Ku nshuro yabo ya mbere bagiye gukorera igitaramo muri BK Arena ndetse bavuga ko bazajya bagikora buri mwaka kuri Pasika.
Iki gitaramo cyabo "Easter Jubilee Music Gathering" bagifata nk'umunsi udasanzwe wo kwizihiza Pasika binyuze mu kuramya Imana no mu muziki wuzuye ibyishimo, bazahuriramo n’abakunzi babo muri BK Arena, ahantu bavuze ko ari “mu rugo” hashobora kwakira no guhuza abakunzi b’umuziki bagera ku bihumbi icumi.
Ben na Chance bategerejwe muri BK Arena mu gitaramo cya Pasika
Abakobwa ba Pastor Julienne Kabanda bashyigikiye cyane igitaramo cya Ben na Chance kizaba kuri Pasika
Favour Tona Kabanda unyotewe n'igitaramo cya Ben na Chance, asanzwe ari umuririmbyi ukomeye ndetse n'umuhanzikazi
Abakobwa ba Pastor Julienne ufitanye amateka akomeye na Ben na Chance, bafite inyota nyinshi yo kwitabira igitaramo "Easter Jubilee" muri BK Arena
Ben na Chance bagiye gukora igitaramo gikomeye "Easter Jubilee Music Gathering" kizaba kuri Pasika
REBA IMWE MU NDIRIMBO ZA BEN NA CHANCE ZITEZWEHO GUTIGISA BK ARENA