Iyi nkuru y'incamugongo yatangajwe na Noa van der
Bij abinyujije ku mbuga nkoranyambaga mu Cyumweru gishize, ibintu byakoze ku mitima
ya benshi.
Mu kiganiro n'abanyamakuru mbere y'umukino wa 1/16
cy'Igikombe cy'Isi u Buholandi bugomba guhuramo na Morocco, Ronald Koeman
yavuze ko Gakpo atigeze agaragaza icyifuzo cyo gusubira iwabo n'ubwo yari ari
mu bihe bikomeye.
Yagize ati: "Nta na rimwe yigeze ansaba gutaha.
Uko yakiriye ibi bibazo byerekana ubukure bwe. Twamubaye hafi kandi azi neza ko
ashobora kutwishingikirizaho, haba ku batoza ndetse no ku bakinnyi bagenzi
be."
Kapiteni w'u Buholandi, Virgil van Dijk, na we
yavuze ko ikintu cy'ingenzi muri ibi bihe ari ukumenya icyo Gakpo akeneye
kurusha ibindi.
Yagize ati: "Ni inkuru ibabaje cyane kandi
itwibutsa ko ubuzima buruta umupira w'amaguru. Cody yakomeje kwihangana kandi
intego ye ni ugufasha igihugu cye kugera kure muri iri rushanwa. Nubaha cyane
uburyo we n'umuryango we bari kwitwara muri ibi bihe bikomeye."
N'ubwo ari mu gahinda gakomeye, Gakpo yakomeje
gufasha igihugu cye mu mikino y'amatsinda, aho yabanje mu kibuga imikino yose
uko ari itatu ndetse anatsinda ibitego bibiri mu mukino batsinzemo Sweden.
U Buholandi bwasoje buyoboye itsinda ryabwo nyuma yo gutsinda Sweden na Tunisia, bukanganya n'u Buyapani, bwitegura guhangana na Morocco mu rukerera rwo kuri uyu wa Kabiri mu mukino wo gushaka itike ya 1/8.
