Abakinnyi 15 baranzwe n’ubuhanga budasanzwe mu mateka ya ruhago

Aba ni abakinnyi bagiye batuma ibintu bigoye bigaragara nk’ibyoroshye, bakoresheje ubuhanga bwo gutwara umupira, kuwufata, gutambuka, gucenga no gukora ibintu bitangaje mu buryo busa n’ubworoshye.

Nk’uko tubikesha GiveMeSport, uru rutonde rushingiye ku bintu birimo igihe umukinnyi yamaze ku rwego rwo hejuru, inshuro yagiye atanga ibihe bitangaje byashimishije abafana ndetse n’ubwiza bw’umukino we ugereranyije n’abakinnyi bo mu gihe cye.

15. Mesut Özil

Mesut Özil wakunzwe cyane muri Arsenal yari umwe mu bakinnyi bagaragazaga ubwiza bw’umupira binyuze mu gutanga imipira neza no kubona ahantu abandi batabonaga. Ubuhanga bwe bwo guhererekanya umupira no gutanga imipira yavamo ibitego bwatumaga umukino we ugaragara nk’uworoshye kandi usobanutse.

14. Lionel Messi

Lionel Messi igihangange cya ruhago na we ari muri uru rutonde kubera uburyo ashoboye gutwara umupira hafi y’amaguru ye, gucenga abamurwanya no gukora ibintu bikomeye mu buryo bworoshye. Nubwo afite umuvuduko n’ubuhanga bwo gutsinda ibitego, uburyo bwe bwo gukina bwagiye bugaragara cyane kubera ituze n’ubushobozi bwo kugenzura umupira.

13. Andrés Iniesta

Andrés Iniesta yari azwiho gukina mu buryo butuje kandi bufite ubwenge. Uburyo yatwaraga umupira, yahinduraga icyerekezo ndetse akanyura ahantu hafunganye hagati y’abakinnyi benshi bwatumaga agaragara nk’umukinnyi ufite ubuhanga budasanzwe.

12. Dennis Bergkamp

Dennis Bergkamp yari umuhanga cyane mu gufata umupira no kuwukoresha mu buryo bwiza. Gucenga kwe kwa mbere, guhindura umupira no kuwushyira ahantu heza byatumaga ibikorwa bigoye bigaragara nk’ibisanzwe.

11. Neymar

Neymar ni umwe mu bakinnyi bazwi cyane ku isi kubera ubuhanga bwo gucenga no gukoresha amayeri atandukanye. Yashoboraga gutera abamurwanya urujijo akoresheje amayeri yihuse, akagenda asa n’uri kubyina afite umupira ku maguru.

10. Dimitar Berbatov

Dimitar Berbatov yari umukinnyi wakinaga nk’aho afite umuvuduko we bwite, mu gihe abandi bakinnyi babaga biruka cyane. Yashoboraga kugaragara nk’aho agenda buhoro, ariko afite ubushobozi budasanzwe bwo kugumana umupira no kuwukoresha neza.

Umunya-Bulgaria yari afite uburyo budasanzwe bwo gufata umupira bwa mbere ndetse no gukora ibikorwa bigoye asa n’aho nta mbaraga nyinshi yabishyizemo. Mu myaka yo hagati no ku mpera za 2000, cyane cyane ubwo yakinaga muri Manchester United, yagaragazaga n’imwe mu mico ubu ijyanye n’umukinnyi ukina nka ‘false nine’.

Umwe mu bihe byamuranze cyane ni igihe yakoze umuzenguruko udasanzwe hafi y’umurongo w’uruhande mu mukino wa West Ham United, mbere yo guha Cristiano Ronaldo umupira wari woroshye kuwushyira mu izamu.

9. Jay-Jay Okocha

Umunya-Nigeria Jay-Jay Okocha ni umwe mu bakinnyi bagombaga kuba kuri uru rutonde. Ku bijyanye no gushimisha abafana, bake ni bo bashobora kumurusha.

Ubuhanga bwe bwo gucenga, gukoresha amayeri no gukora ibintu bitandukanye n’ibyari bitegerejwe byatumaga abamurwanya basigara bamukurikirana batamufata. Yashoboraga gutwara umupira asa n’aho wiziritse ku birenge bye.

Kimwe mu bikorwa bye byibukwa cyane ni igitego yatsinze Eintracht Frankfurt ubwo yacengaga abakinnyi benshi ndetse agasiga n’umunyezamu w’icyamamare Oliver Kahn mu rujijo, mbere yo gutuza agashyira umupira mu izamu.

8. Johan Cruyff

Johan Cruyff ni umwe mu bakinnyi bagize uruhare rukomeye mu mateka y’umupira w’amaguru. Ni we wamamaje cyane uburyo bwo guhindukira buzwi nka ‘Cruyff Turn’, ubu bukaba ari bumwe mu buhanga buzwi cyane muri ruhago.

Mu bihe bibiri yakiniye Ajax, yatwaye ibikombe umunani bya Eredivisie ndetse n’ibikombe bitanu by’u Buholandi. Yanagize uruhare rukomeye mu gufasha Ajax gutwara European Cup inshuro eshatu zikurikirana mu ntangiriro za 1970.

Cruyff ntiyari umuhanga mu gucenga gusa. Intego ye yari kuringaniza umubiri ndetse n’ituze igihe yabaga afite umupira byatumaga agaragara nk’umuhanzi uri ku kibuga. Yegukanye Ballon d’Or inshuro eshatu mu buzima bwe.

7. George Best

George Best yari afite ubushobozi bwo guhuza umuvuduko, kwihuta no gucenga ku buryo yashoboraga guca ku bakinnyi benshi asa n’uri kunyura hagati yabo nta ngorane.

Ikindi cyamugiraga umwihariko ni uko yashoboraga gukoresha amaguru yombi mu gutera amashoti no gutanga imipira. Ibi byatumaga abo bahanganye batamenya neza aho agiye kunyura.

Muri Manchester United, Best yabaye icyamamare kubera uburyo yababazaga ubwirinzi bw’amakipe bahanganye.

6. Garrincha

Garrincha yari umuhanga mu gucenga no guhindura icyerekezo mu buryo butunguranye, bigatuma ba myugariro bagorwa no kumufata. Nubwo yari afite ibibazo bikomeye by’umubiri, yakomeje kugaragaza ubuhanga budasanzwe bwo kugenzura umupira no guhanga ibidasanzwe, bituma aba umwe mu bakinnyi bakomeye mu mateka.

5. Pelé

Pelé, umwe mu bakinnyi bakomeye cyane mu mateka y’umupira w’amaguru, aza ku mwanya wa gatanu. Umunya-Brazil yari afite ubushobozi bwo gutwara umupira, gutanga imipira no gutsinda ibitego mu buryo busa n’ubworoshye cyane.

Ntiyari akeneye gukoresha amayeri menshi kugira ngo agaragare. Hafi ya buri gikorwa yakoraga cyabaga gifite intego, ariko akagikora mu buryo bworoshye kandi butuje.

Kuba abakiri bato batabonye amashusho menshi y’ibyo yakoraga bishobora gutuma batumva neza ubuhanga bwe. Ariko ab’igihe cye bamubonye kenshi bavuga ko yari hejuru cyane y’abakinnyi benshi bakinaga muri icyo gihe.

4. Zinedine Zidane

Bake ni bo bashoboye guhuza imbaraga n’ubwiza bw’umukino nka Zinedine Zidane. Uko yagenzuraga umupira, uko yahindukaga ndetse n’ubuhanga bwe mu kuwufata, haba ku mupira uri hasi cyangwa uri mu kirere, byari ku rwego rwo hejuru.

Nubwo atari umukinnyi wakundaga cyane gukoresha amayeri yo kwiyerekana, Zidane yari afite ubushobozi budasanzwe bwo gutuma umupira w’amaguru usa nk’aho ari ibintu byoroshye.

Yari umuhanga mu bice byinshi by’umukino, cyane cyane ahantu hafunganye aho yakoreshaga cyane uburyo bwe bwo guhindukira, buzwi nka ‘roulette’. Zidane kandi ari mu bakinnyi 11 gusa mu mateka begukanye Ballon d’Or, Champions League n’igikombe cy’isi.

3. Ronaldo Nazário

Ronaldo Nazário, uzwi nka O Fenômeno, yari umukinnyi wihariye wahuzaga ubuhanga, tekiniki n’umuvuduko ukomeye. Gucenga kwe ku muvuduko mwinshi, gukoresha amayeri no guhindura icyerekezo byatumaga ba myugariro bagorwa no kumuhagarika.

Yakiniye Barcelona, Inter Milan na Real Madrid, aho yagaragaje ubuhanga budasanzwe bwo gucenga no gutsinda. Yagize uruhare mu guhindura imyumvire ku mwanya wa nimero icyenda, ayihinduramo umwanya ushobora gukoreramo byinshi birenze gutegereza umupira mu rubuga rw’amahina.

Nubwo imvune zamugizeho ingaruka, Ronaldo yagumye kuba umwe mu bakinnyi badasanzwe mu mateka y’umupira w’amaguru.

2. Diego Maradona

Diego Maradona ntiyanyuraga ku bakinnyi bahanganye gusa, uburyo yabikoragamo wasangaga asa n’uri kubabyinisha. Ntabwo yakeneraga gukoresha amayeri menshi nk’ay’abakinnyi bo muri iki gihe, kuko yari afite umuvuduko utunguranye, kwihuta ndetse no kugenzura umupira ku rwego rudasanzwe.

Benshi ntibakwibagirwa igitego cyiswe ‘Igitego cy’Ikinyejana’ yatsinze u Bwongereza mu Gikombe cy’Isi cya 1986, yagaragaje uburyo yashoboraga kunyura ku bakinnyi benshi asa n’aho nta mbaraga nyinshi abishyizemo, nubwo bamukoreraga amakosa menshi.

1. Ronaldinho

Ronaldinho ni we uza ku mwanya wa mbere kuri uru rutonde kubera uburyo budasanzwe yahuzaga ibyishimo, guhanga udushya n’ubwiza bw’umukino.

Gufata umupira bwa mbere, amayeri, gucenga mu buryo butateganyijwe ndetse n’ubushobozi bwo gukora ibintu bitangaje byagaragazaga umwuka w’umupira w’amaguru wo muri Brazil.

Yashoboraga gutuma igikorwa kidasanzwe gisa n’igisanzwe. Yakoraga elastico, agateza umupira hejuru y’umukinnyi, agatanga imipira atarebye ndetse akanaterera umupira hejuru y’umunyezamu mu buryo butangaje.

Kuri Ronaldinho, akenshi ikibazo nticyabaga ubushobozi bwo gukora ikintu gitangaje, ahubwo rimwe na rimwe cyabaga ari ugufata umwanzuro ukwiye.