Muri aba bakinnyi harimo ibyamamare bimaze imyaka myinshi biyoboye ruhago y'Isi ndetse n'abakiri bato bakomeje kwigaragaza nk'abazafata umwanya w'abakomeye bari kugana ku musozo w'ibihe byabo mu mupira w'amaguru.
Lionel Messi
Lionel Messi ni umwe mu bakinnyi bazakurikiranwa cyane muri iri rushanwa. Mu myaka ine ishize muri Qatar, yayoboye Argentine yegukana Igikombe cy'Isi ndetse ashimangira umwanya we mu bakinnyi bakomeye mu mateka ya ruhago, benshi bagereranya ibyo yakoze n'ibyagezweho na Diego Maradona.
Cristiano Ronaldo
Undi mukinnyi utegerejwe cyane ni Cristiano Ronaldo wa Portugal. Nubwo agejeje ku myaka 41, aracyakomeje kugaragaza inyota yo gutsinda no gukora amateka mashya.
Ronaldo yerekeje muri iki gikombe nyuma yo gufasha Al Nassr FC kwegukana igikombe cya shampiyona muri Arabiya Sawudite. Mbere yaho yatwaye ibikombe byinshi ari kumwe na Manchester United, Real Madrid na Juventus, harimo na UEFA Champions League inshuro eshanu.
Yanatwaye Igikombe cy'Uburayi cya 2016 na UEFA Nations League ebyiri ari kumwe na Portugal. Nubwo yageze ku byinshi, Igikombe cy'Isi ni cyo gikombe gikomeye atarabasha kwegukana, ibintu bituma benshi bategereza kureba niba azabigeraho mbere yo gusezera ruhago.
Kylian Mbappé
Kylian Mbappé akomeje gufatwa nk'umwe mu bakinnyi beza ku Isi nyuma y'ibihe byaranze Messi na Ronaldo. Uyu rutahizamu wa Real Madrid yatwaye Igikombe cy'Isi mu 2018 ariko aracyafite intego zo gutwara UEFA Champions League ndetse na Ballon d'Or.
Benshi bamubonamo umukandida ukomeye wo kwegukana Ballon d'Or y'uyu mwaka cyane cyane niba yakomeza kwitwara neza mu marushanwa atandukanye ndetse agafasha Ubufaransa kugera kure muri iki gikombe.
Ousmane Dembélé
Ousmane Dembélé na we ari mu bakinnyi bazitabwaho n’abafana cyane. Uyu Mufaransa amaze imyaka mike agaragaza urwego rwo hejuru muri Paris Saint-Germain.
Nyuma yo kugurwa na Barcelona kuri miliyoni 173 z'amadolari mu 2017, ntiyabashije kugera ku rwego benshi bari bamwitezeho. Icyakora kuva yagera muri PSG yongeye kuzamuka cyane ndetse afasha iyi kipe kwegukana UEFA Champions League bwa mbere mu mateka yayo.
Erling Haaland
Erling Haaland wa Norway azakina irushanwa rikomeye mpuzamahanga bwa mbere nyuma yo gukora amateka menshi ku rwego rw'amakipe.
Uyu rutahizamu wa Manchester City amaze kwandika amateka muri Premier League no muri Champions League kubera ibitego byinshi atsinda. Nubwo Norway itabarizwa mu makipe ahabwa amahirwe menshi, Haaland ashobora gutuma ibintu bihinduka kubera ubushobozi bwe budasanzwe imbere y'izamu.
Lamine Yamal
Lamine Yamal wa Espagne ni umwe mu bakinnyi bakiri bato bahanzwe amaso cyane. Yamamaye cyane mu Gikombe cy'Uburayi cya 2024 aho yaciye agahigo ko kuba umukinnyi muto watsinze igitego muri iri rushanwa.
Impano ye yatumye benshi bamugereranya na Messi, ndetse ifoto yafashwe akiri uruhinja ari kumwe n'uyu Munya-Argentine yakomeje kuvugisha benshi. Benshi babona Yamal nk'umwe mu bazafata umwanya wa Messi na Ronaldo mu myaka iri imbere.
Jude Bellingham
Jude Bellingham ni umwe mu bakinnyi bo hagati beza ku Isi muri iki gihe. Kuva yava muri Borussia Dortmund akerekeza muri Real Madrid mu 2023, yakomeje kwitwara neza ndetse afasha iyi kipe gutwara ibikombe bikomeye. Azaba umwe mu nkingi za mwamba z'Uu Bwongereza bushaka gutwara igikombe gikomeye bwa mbere kuva mu 1966.
Neymar
Neymar na we azaba ari mu bakinnyi bazitabwaho cyane. Uyu Munya-Brazil ni we umaze gutsindira igihugu cye ibitego byinshi kurusha abandi bose, aho yarenze amateka ya Pelé. Nubwo yageze kuri byinshi mu mupira w'amaguru, ntarashobora kugeza Brazil ku gikombe cya gatandatu cy'Isi.
Ubu akinira Santos FC nyuma yo kuva muri Al Hilal, kandi yahamagawe n'umutoza Carlo Ancelotti mu ikipe y'igihugu ya Brazil ku nshuro ya kane yitabiriye Igikombe cy'Isi.
Mohamed Salah
Mohamed Salah ni umwe mu bakinnyi Afurika itezeho byinshi muri iri rushanwa. Uyu Munya-Misiri yatsinze ibitego 257 mu mikino 442 yakiniye Liverpool ndetse anatwara ibikombe bikomeye birimo Champions League na Premier League.
Nubwo yagejeje Misiri ku mikino ya nyuma ya CAN inshuro ebyiri, ntabwo arabasha gutwara icyo gikombe ndetse anakeneye kuyifasha ikitwara neza mu gikombe cy’Isi cya 2026.
Christian Pulisic
Umunya-Amerika Christian Pulisic asoza urutonde rw'abakinnyi 10 bazakurikiranwa cyane. Uyu mukinnyi wa AC Milan yakiniye amakipe akomeye arimo Borussia Dortmund na Chelsea, ndetse anatwara UEFA Champions League. Mu gihe Igikombe cy'Isi kizabera muri Amerika, azaba umwe mu bakinnyi igihugu cye kizishingikirizaho kugira ngo kigere kure muri iri rushanwa.