Nk’uko tubikesha Transfermarkt, dore bamwe mu bakinnyi babaye "ibiciro by'agahebuzo"kugeza ubumuri iyi mpeshyi, aho amafaranga yatanzwe yabaye make cyane ugereranyije n'agaciro kabo ku isoko.
Konaté ni we uyoboye urutonde
Myugariro w'Umufaransa Ibrahima Konaté ni we ufatwa nk'uwaguzwe ku giciro cyiza kurusha abandi muri iyi mpeshyi. Yavuye muri Liverpool yerekeza muri Real Madrid ku buntu, nyamara agaciro ke ku isoko kari hafi miliyoni 45 z'amayero.
Ibi bivuze ko Real Madrid yabonye umwe mu ba myugariro beza i Burayi idatanze amafaranga y'igurwa, usibye amafaranga asanzwe ahabwa umukinnyi igihe asinya amasezerano.
Nyuma ya Konaté hakurikiraho abandi bakinnyi batatu na bo bahinduye amakipe nta mafaranga y'igurwa atanzwe.
Marcos Senesi yerekeje muri Tottenham ku buntu, nubwo agaciro ke ku isoko kari miliyoni 25 z'amayero.
Harry Wilson yinjiye muri Leeds United na we ku buntu, afite agaciro kangana na miliyoni 25 z'amayero.
Bernardo Silva yimukiye muri Real Madrid ku buntu, nubwo agaciro ke ku isoko kageraga kuri miliyoni 22 z'amayero.
Aya makipe yose yabashije kuzigama amafaranga menshi yari gutangwa mu kugura aba bakinnyi.
Si abagiye ku buntu gusa bagaragaye nk'ibiciro byiza. Hari n'abaguzwe amafaranga ari hasi cyane ugereranyije n'agaciro kabo.
Donyell Malen yerekeje muri AS Roma avuye muri Borussia Dortmund kuri miliyoni 25 z'amayero, nyamara agaciro ke ku isoko kari miliyoni 45 z'amayero. AS Roma bivuze ko yazigamye miliyoni 20 z'amayero.
Ni na ko byagenze kuri Bilal El Khannouss, wavuye muri Leicester City yerekeza muri Stuttgart kuri miliyoni 15 z'amayero, mu gihe agaciro ke ku isoko kari miliyoni 35 z'amayero.
Rutahizamu Karim Adeyemi yavuye muri Borussia Dortmund yerekeza muri Barcelona kuri miliyoni 18 z'amayero, mu gihe agaciro ke ku isoko kari miliyoni 38 z'amayero. Ibi bivuze ko Barcelona yamuguze amafaranga ari munsi y'agaciro ke ho miliyoni 20 z'amayero.
Mu bandi bari mu bakinnyi 10 ba mbere harimo:
Malang Sarr, wimukiye muri shampiyona ya Saudi Arabia ku buntu.
Jakub Kiwior, wavuye muri Arsenal ajya muri FC Porto kuri miliyoni 17 z'amayero, amafaranga ari munsi y'agaciro ke ho miliyoni 18 z'amayero.
Óscar Mingueza, wavuye muri Celta Vigo yerekeza muri Crystal Palace ku buntu, na we agaciro ke kari hejuru cyane y'ayo yatanzwe.
Nubwo amakipe menshi akomeje gukoresha amafaranga menshi mu isoko ry'abakinnyi, urugero rw'aba bakinnyi rugaragaza ko gukurikiranira hafi amasezerano yenda kurangira cyangwa kugura umukinnyi ku gihe bishobora gutuma ikipe ibona umukinnyi mwiza idakoresheje amafaranga menshi.
Real Madrid, Barcelona, AS Roma, Tottenham na Stuttgart ni zimwe mu makipe agaragara nk'ayungukiye cyane muri iyi mpeshyi, nyuma yo kubona abakinnyi bafite agaciro gakomeye ku mafaranga make cyangwa se ku buntu.