Mu gihe umwuka mubi ukomeje kuzamuka hagati ya Pakisitani na Afuganisitani, benshi bakomeje kwibaza inkomoko y'aya makimbirane, imbaraga za gisirikare buri gihugu gifite ndetse n'icyagira amahirwe menshi mu gihe intambara yakwaguka.
Afuganisitani yabonye ubwigenge mu 1919, mu gihe Pakisitani yabaye igihugu cyigenga mu 1947 nyuma yo kwitandukanya n'u Buhinde.
Nubwo ibihugu byombi bihuriye ku mupaka wa Durand Line, uwo mupaka umaze imyaka myinshi utera amakimbirane. Afuganisitani ntiyigeze yemera ku mugaragaro ko Durand Line ari umupaka mpuzamahanga, mu gihe Pakisitani iwufata nk'umupaka wemewe n'amategeko.
Mu myaka yashize, ibihugu byombi byigeze kugirana umubano mwiza, cyane cyane mu gihe Pakisitani yashyigikiraga abarwanyi ba Mujahideen barwanyaga Abasoviyeti, ndetse nyuma igashyigikira ubutegetsi bwa Taliban.
Icyakora, kuva Taliban yongeye gufata ubutegetsi muri Afuganisitani mu 2021, umubano wongeye kuzamo umwuka mubi. Pakisitani ishinja Afuganisitani gucumbikira umutwe wa Tehreek-e-Taliban Pakistan (TTP), ushinjwa kugaba ibitero by'iterabwoba muri Pakisitani.
Ku rundi ruhande, Afuganisitani ihakana ibyo birego, ahubwo igashinja Pakisitani kugaba ibitero by'indege no kurasa ku baturage batuye hafi y'umupaka, ibintu byatumye amakimbirane arushaho gukaza umurego.
Aya makimbirane amaze guhitana abantu benshi ku mpande zombi. Muri Pakisitani, imibare igaragaza ko mu mwaka wa 2024 abasivili barenga 2,000 bishwe mu bitero byagabwe n'umutwe wa TTP.
Muri Afuganisitani, na ho abasivili babarirwa mu magana bamaze kwicwa. Mu mezi atatu ya mbere ya 2026 honyine, abarenga 370 bahitanywe n'ibitero n'imirwano yabereye hafi y'umupaka, hakiyongeraho n'abishwe mu bitero biherutse.
Imibare yerekana ko Pakisitani irusha kure Afuganisitani imbaraga za gisirikare.
| Ikigereranyo | 🇵🇰 Pakisitani | 🇦🇫 Afuganisitani |
|---|---|---|
| Abasirikare bakora | 660,000 | 172,000 |
| Indege z'intambara | 465 | 0 |
| Intwaro za kirimbuzi | Yego | Oya |
| Umwanya ku isi mu mbaraga za gisirikare (2026) | 14 | 55 |
Iyi mibare igaragaza ko Pakisitani ifite ingabo nyinshi, indege z'intambara zigezweho ndetse n'intwaro za kirimbuzi, ibintu bituma iba mu bihugu bikomeye ku isi mu bya gisirikare.
Ni nde ufite amahirwe yo gutsinda?
Mu buryo bw'imbaraga za gisirikare zisanzwe, abasesenguzi bavuga ko Pakisitani ari yo ifite amahirwe menshi yo gutsinda urugamba rw'imbere ku rugamba, bitewe n'ubwinshi bw'ingabo zayo, ibikoresho bya gisirikare bigezweho n'ubushobozi bwo kurwanira mu kirere. Icyakora, bagaragaza ko intsinzi ya gisirikare idahita isobanura kurangiza intambara burundu.
Afuganisitani ifite amateka maremare y'intambara z'imitwe yitwaje intwaro ndetse n'ubunararibonye mu kurwanira mu misozi no mu bice bigoye kugeramo. Iyo miterere y'igihugu yagiye ituma ingabo z'ibihugu bikomeye, zirimo iz'icyahoze ari Leta Zunze Ubumwe z'Abasoviyeti na Leta Zunze Ubumwe za Amerika, zimara imyaka myinshi zihanganye n'imitwe yitwaje intwaro.
Ni yo mpamvu abasesenguzi bavuga ko, nubwo Pakisitani ishobora kugira amahirwe menshi mu ntambara ishingiye ku mbaraga za gisirikare, kurangiza burundu amakimbirane hagati y'ibi bihugu byombi bishobora gufata igihe kirekire, cyane cyane mu gihe impamvu z'ishingiro zayo zitakemuwe binyuze mu nzira za dipolomasi n'ibiganiro.