Abahanzi Nyarwanda basubiyemo indirimbo ya Patrick Norman bategerejwe muri Canada mu gukusanya Miliyoni 2$ – AMAFOTO

Uyu mushinga, uzwi nka Projet Québec-Afrique, ugamije gukoresha umuziki nk’igisubizo cyo guhuza abantu no kugaragaza urukundo n’ubumwe nk’imbaraga zishobora guhindura imibereho.

Iyi ndirimbo yamuritswe ku mugaragaro mu ijoro ryo kuri uyu wa Kane tariki 11 Nzeri 2025, mu muhango wabereye muri Kigali Universe witabiriwe n’abantu mu ngeri zinyuranye.

Padiri Cyprien, uhagarariye Projet Québec-Afrique ndetse n’ikigo Institut La Voix des Profondeurs  yavuze ko batekereje guhuza abahanzi mu ndirimbo imwe hagamijwe gushakisha inkunga yo gufasha imiryango ikennye mu byaro.

Yagize ati “Muri uyu mushinga tugamije ko duhuza abantu batandukanye, mbere na mbere guhuza abantu bo mu Cyaro no mu Mijyi bakuzuzanya, tugahuza abantu bo mu Rwanda no mu mahanga bakuzuzanya, tugahuza abakuru' n'abato bakuzuzanya, abishoboye n'abatishoboye, urubyiruko n'abakuze, ibyo bifite aho bihuriye n'urukundo."

Asubiza ikibazo cy’umunyamakuru wa InyaRwanda, Padiri Cyprien yavuze mu Ugushyingo 2025 bateganya ko bamwe mu bahanzi nyarwanda bazajya muri Québec mu gihugu cya Canada, hagamijwe kumurika iyi ndirimbo no gukomeza ibikorwa byo gushakisha inkunga.

Ati “Ikindi ni uko mu Ugushyingo 2025 biteganyijwe ko abahanzi bamwe na bamwe abazabibasha cyangwa se abazabona 'visa' tuzajya muri Quebec muri Canada, naho noneho hakaba uburyo bwo kuyimurika, no kumurika ibindi bigize iyi ndirimbo [...] Ariko birateganyijwe, bamwe muri aba bahanzi batangiye no gushaka 'Visa' abatazifite."

Amafaranga azava muri uyu mushinga azashorwa mu bikorwa birimo gufasha ivuriro ryo muri Rutsiro (Poste de Santé), guteza imbere ubuhinzi, kurwanya igwingira n’imirire mibi, ndetse no kubungabunga ibidukikije.

Buri muhanzi nyarwanda wasubiyemo iyi ndirimbo yagaragaje ko bishimiye kuba barahawe amahirwe yo kwifatanya n’abandi barenga 130 bo muri Canada.

Bwiza yagize ati “Kwisanga muri uyu mushinga ni ibintu nishimiye. Cyane ko intego yo gukora kuri uyu mushinga ijyanye no kugira ubumuntu no kugira urukundo. Gukorana n'abahanzi bagenzi banjye, ndetse no kwisanga ndi gusubiramo indirimbo nini nk'iyi twese twakuze twumva, byari byiza cyane. Ni ibintu nishimiye kandi mfata nk'ibidasanzwe."

Bruce Melodie yavuze ko kuba umuhanzi atari ugukora indirimbo gusa, ahubwo ari no kugira uruhare mu guhindura imibereho y’abantu.

Ati “Mu buto bwacu twese twarayiririmbye, njyewe numvaga ari n'umunsi wo kubeshya, ntabwo numvaga naririmba mu ndirimbo nini nk'iyi. Ndishimye cyane, kuba iki gikorwa twatangiye, tukigejeje aho nibura dushobora kukimurikira abantu.'

Umuhanzikazi Marina Deborah we yavuze ko yanyuzwe n'intego y'uyu mushinga wagejeje ku gusubiramo indirimbo “Quand on est en amour” ya Patrick Norman. Avuga ko azi neza ko umusaruro uzava muri iyi ndirimbo 'uzafasha Abanyarwanda bagenzi bacu'.

Juno Kizigenza we yavuze ko yakuze akunda iyi ndirimbo cyane n'ubwo atari azi nyirayo, ndetse ko yatunguwe no kumva bamubwira ko ari umwe mu bahanzi batoranyijwe bazaririmbamo.

Ati "Ubwo bambwiraga ko nzaririmba muri iyi ndirimbo, navuze ko ari umugisha kuri njye, kandi narishimye cyane."

Producer Loader, wabigizemo uruhare mu bijyanye no gutunganya amajwi, yavuze ko yungukiye byinshi muri uru rugendo.

Yagize ati: “Nakoranye n’abahanzi bacu hano mu Rwanda ndetse mafatanya na Producer Christian usanzwe akorera indirimbo Celine Dion. Byari urugendo rw’inyigisho zikomeye.”

Indirimbo “Quand on est en amour” yahindutse ikimenyetso cy’urukundo, ubumwe n’icyizere, igaragaza uburyo umuziki ushobora gukoreshwa nk’inyungu rusange mu gufasha abatishoboye.

Uyu mushinga ukomeje kwerekana ko umuziki urenze kuba umwuga, ahubwo ari igikoresho cyo guhuza abantu n’isi yose mu bufatanye n’urukundo.

Bruce Melodie avuga ko yakuze akunda iyi ndirimbo ku buryo ubwo bamubwiraga ko azayiririmbamo yumvise ari ukubeshya. Ariko yishimiye cyane kuba muri uyu mushinga

Bwiza avuga ko kwisanga muri uyu mushinga byamukoze ku mutima. Yishimiye cyane intego yawo ishingiye ku rukundo n’ubumuntu
Marina Deborah yanyuzwe n’intego y’uyu mushinga kandi yizeye ko umusaruro uzafasha Abanyarwanda bagenzi be

Juno Kizigenza yavuze ko yakuze akunda iyi ndirimbo, kandi kuba yaratoranyijwe ngo aririmbe, yabibonye nk’umugisha w’umwihariko kuri we 

Producer Loader yumvikanishije ko yungukiye byinshi mu rugendo rwo gufata amajwi, ndetse no gukorana n’abahanga ku rwego mpuzamahanga

 
Padiri Cyprien yasobanuye ko uyu mushinga ugamije guhuza abantu batandukanye, abakuru n’abato, abishoboye n’abatishoboye, kugirango urukundo n’ubumuntu bigere kuri bose 

Padiri Cyprien yatangaje ko uyu mushinga ugamije gukusanya 2,000,000 CAD [2,090,000,000 Frw]

Abarimo Producer Loader, Bwiza, Bruce Melodie, Juno Kizigenza, na Marina baririmbye basubiramo indirimbo ya Patrick Norman

Umunyamakuru wa B&B Kigali Fm, Bayingana David

Umunyamakuru w'Ikigo cy'Igihugu cy'Itangazamakuru (RBA), Basile Uwimana

Bugingo Bonny wamamaye nka Junior Giti yitabiriye umuhango wo kumurika iyi ndirimbo

Umunyamakuru w'Ikigo cy'Igihugu cy'Itangazamakuru (RBA), Kate Gustave yagaragaje ko iyi ndirimbo izazamura urwego rw'abahanzi nyarwanda

Aristide Gahunzire wabaye umujyanama w'abahanzi banyuranye, akaba n'umwe mu bashinze Urban Radio

Umunyamakuru wa Radio/Tv10, Khamiss Sango wayoboye umuhango wo kumurika kumugaragaro indirimbo ya Patrick Norman

KANDA HANO UBASHE KUREBA AMASHUSHO Y'IYI NDIRIMBO YA PATRICK NORMAN ABAHANZI BASUBIYEMO