Aba
bahanzi batoranyijwe banyuze mu byiciro bitatu by’isesengura,
byatangiye nyuma y’isozwa ry’iyamamaza ryo kwakira dosiye ku wa 20 Ugushyingo
2025. Ibi byiciro byitabiriwe n’inzobere mu muziki zo muri RFI, abanyamakuru
bigenga ndetse n’abahanzi b’inararibonye.
Nk’uko
RFI yabitangaje, abari mu itsinda ry’abacamanza bashingiye ku mwimerere
n’umwihariko w’ubuhanzi bw’abahataniye igihembo, ubushobozi bwo gutaramira
imbaga imbona nkubone, uburyo bashobora kwagura umuziki wabo bakarenga imbibi
z’ibihugu byabo, ndetse n’uburyo bitwara imbere y’abafana n’itangazamakuru.
Kuri
iyi nshuro, akanama nkemurampaka kayobowe n’umuraperi w’icyamamare MC Solaar,
umwe mu nkingi za mwamba mu muziki w’igifaransa n’uw’Afurika.
Urutonde
rw’abahanzi 10 batoranyijwe, rwatangajwe hashingiwe ku nyuguti za alufabeti (Alphabetical
order), rugizwe n’abahagarariye ibihugu bitandukanye byo muri Afurika ndetse no
mu birwa bya Karayibe (Caribbean), bahagarariye injyana zitandukanye z’umuziki.
Urutonde
ruriho: Claudio Rabé (Madagascar), Def Mama Def (Senegal), Malha (Comoros), Manu
Desroches (Maurice), Opa (Benin), Sym Sam (Senegal), Tyty Meufapart
(Congo-Brazzaville), Yewhe Yeton (Benin), na Yotsi (Repubulika Iharanira
Demokarasi ya Congo – DRC).
Aba
bahanzi bose bahurijwe ku kuba bafite umwimerere wihariye mu bihangano byabo,
bakaba bari mu cyiciro cy’abahanzi bari kwiyubaka ku rwego mpuzamahanga, ndetse
bafite intego yo gutuma umuziki wabo ugera ku masoko yo hanze y’ibihugu
bakomokamo.
RFI
yatangaje ko abafana b’umuziki hirya no hino ku Isi bemerewe gutora umuhanzi
bakunda kugeza ku wa 11 Werurwe 2026, aho ijwi ry’abaturage rizabarwa nk’ijwi
rimwe mu bagize akanama nkemurampaka.
Iki
gihembo cya Prix Découvertes RFI kimaze imyaka myinshi gifasha abahanzi bakiri
kuzamuka kubona amahirwe yo kumenyekana ku rwego mpuzamahanga, kikaba
cyaratangiriye inzira abahanzi benshi bageze kure mu muziki wa Afurika.
Nubwo
kuri iyi nshuro nta muhanzi wo mu Rwanda uri muri aba 10, ariko mu myaka
yatambutse hari abagiye bahatana barimo Mike Kayihura, Kaya Byinshi, Boukuru, na Mani
Martin.
Igihembo
mpuzamahanga cya Prix Découvertes RFI, gitangwa na Radio mpuzamahanga
y’Abafaransa (RFI), ni kimwe mu bihembo bikomeye bifasha abahanzi bo muri
Afurika n’abo mu bihugu bikoresha igifaransa kumenyekana ku rwego mpuzamahanga.
Umuhanzi
wegukanye iki gihembo ahabwa inkunga y’amafaranga angana n’Amayero 10,000,
agamije kumufasha gushyira mu bikorwa imishinga ye y’umuziki, irimo gutunganya
indirimbo, amashusho, no kwagura ibikorwa bye ku masoko mpuzamahanga.
Si
amafaranga gusa ahabwa, kuko anahabwa amahirwe yo gutaramira mu bitaramo
n’iminsi mikuru y’umuziki mpuzamahanga, bituma ahura n’abafana batandukanye ku
Isi. RFI kandi imushyigikira mu kumwamamaza mu bitangazamakuru byayo,
bikamufasha kongera izina rye n’ibihangano bye.
Byongeye,
uwatsinze ahabwa inkunga mu micungire y’umwuga, harimo ubujyanama n’imikoranire
n’inzobere mu nganda z’umuziki, bigafasha umuhanzi gutera intambwe ifatika mu
rugendo rwe.
Mu
myaka yashize, iki gihembo cyabereye intangiriro abahanzi benshi bageze kure mu
muziki wa Afurika, bituma Prix Découvertes RFI ikomeza gufatwa nk’urubuga
rukomeye rwo kuzamura impano nshya.
Abagize
akanama nkemurampaka k’irushanwa rya Prix Découvertes RFI, batangaje abahanzi
10 ba mbere bahize abandi bahataniye iki gihembo kuri iyi nshuro