Buri mwaka, ibihugu bikoresha miliyari z'amadolari mu gusana imihanda yangizwa n'imvura, ubushyuhe, uburemere bw'imodoka n'igihe. Ariko kugeza ubu, gusana umuhanda byasabaga abakozi benshi, imashini ziremereye ndetse rimwe na rimwe gufunga umuhanda amasaha cyangwa iminsi.
Abashakashatsi bo muri University of Liverpool, bafatanyije n'inzobere mu ikoranabuhanga ry'ubwubatsi, bakoze robot ishobora gukora kimwe muri ibyo bikorwa idakeneye kuyoborwa n'umuntu.
Iyi robot ikoresha camera, sensors n'ubwenge bw'ubukorano (AI) kugira ngo isuzume umuhanda, imenye ibice byangiritse ndetse ihitemo uburyo bwo kubisana.
Iyo ibonye umwobo cyangwa igice cyatangiye gusaduka, ibanza kugipima, ikagena ubunini bw'ikibazo, hanyuma igakoresha ibikoresho biyiriho kugira ngo ishyiremo ibikoresho byo gusana no kubitunganya.
Abahanga bavuga ko ibi bituma ikibazo gikemurwa mbere y'uko cyaguka kikaba cyateza impanuka cyangwa kikazatwara amafaranga menshi mu gusanwa.
Ikindi cyiza ni uko robot ishobora gukora nijoro cyangwa mu gihe umuhanda utarimo imodoka nyinshi, bityo ibikorwa byo gusana ntibibangamire urujya n'uruza.
Abashakashatsi bavuga kandi ko gukoresha robot nk'izi bishobora kugabanya ibyago by'abakozi bakorera hafi y'imodoka ziri mu muhanda, aho impanuka zikunze kubabaho.
Nubwo iri koranabuhanga rikiri mu rwego rwo kugeragezwa, ibihugu byinshi byo mu Burayi n'ibigo bikora ibikorwa remezo byatangiye kurigaragariza inyungu, cyane cyane mu mijyi ifite imihanda myinshi ikenera gukurikiranwa buri gihe.
Abahanga bemeza ko mu gihe kiri imbere, robot nk'izi zishobora gukorana n'izindi mashini zikurikirana imihanda kugira ngo ibikorwa byo kuyisana bikorwe mbere y'uko abaturage banabona ikibazo.
Iyo iri koranabuhanga ritangiye gukoreshwa ku rugero runini, rishobora kugabanya amafaranga leta zikoresha mu gusana imihanda, kugabanya igihe abaturage batakaza mu muhanda ndetse no kongera umutekano w'abakozi n'abakoresha umuhanda.
Ni imwe mu ngero zigaragaza uko robot n'ubwenge bw'ubukorano bitangiye kugira uruhare mu bikorwa byari bisanzwe bikorwa n'abantu.
Robot ishobora gusana imihanda idafashijwe n'abakozi ni indi ntambwe ikomeye mu ikoranabuhanga ry'ubwubatsi. Nubwo ikiri mu igeragezwa, abahanga bavuga ko ishobora guhindura uburyo imihanda yubakwa ikanabungabungwa, ikarushaho gutuma ibikorwa remezo bikorwa vuba, bihendutse kandi bifite umutekano.