Mu gihe abategereje ibihembo bya Grammy Awards bakomeje amatsiko y’abazatoranywa, Rolling Stone yatangaje urutonde rw’abahanzi umunani ibona ko bashobora guhatana muri iki cyiciro gikomeye.
Aba bahanzi barimo Brandi Carlile, Olivia Dean, Ella Langley, Bruno Mars, Raye, Olivia Rodrigo, Taylor Swift na Don Toliver.
Iki cyiciro gishobora kuzagaragaramo ihangana rikomeye, kuko nta ndirimbo imwe kugeza ubu abasesenguzi bahurizaho ko ari yo izatwara igihembo nta mpaka.
Tony Gervino, umuyobozi mukuru wa Tidal, yavuze ko uyu mwaka utandukanye n’igihe indirimbo imwe iba yarigaruriye imitima ya benshi ku buryo abantu benshi bahita bayifata nk’iya mbere. Yatanze urugero ku ndirimbo ‘Not Like Us’ ya Kendrick Lamar, yegukanye igihembo cya Song of the Year mu 2025.
Tiana Lewis, ushinzwe gahunda z’umuziki wa Pop muri Apple, na we yavuze ko urutonde rw’abahanzi bashobora guhatana muri uyu mwaka rushimishije, cyane cyane kubera impano nshya ziri kuzamuka.
Olivia Dean ahabwa amahirwe yo kwegukana igihembo
Mu bahanzi bashobora guhatanira iki gihembo, Olivia Dean ni we Rolling Stone yahaye amahirwe menshi yo kwegukana igihembo, binyuze mu ndirimbo ye ‘Man I Need’.
Abasesenguzi bagaragaza ko iyi ndirimbo imaze igihe ikundwa cyane, ndetse ko uburyo Olivia Dean akora umuziki bushobora kumufasha mu guhatanira ibihembo bikomeye bya Grammy.
Tiana Lewis yamugereranyije n’abandi bahanzi nka H.E.R., Adele na Alicia Keys, avuga ko abahanzi bafite imiterere nk’iyabo bashobora kwegukana ibihembo byinshi cyangwa ntibagire na kimwe batwara.
Ella Langley na we ahabwa amahirwe akomeye
Nubwo Olivia Dean ahabwa amahirwe yo kwegukana igihembo, Rolling Stone yo yagaragaje ko indirimbo ‘Choosin’ Texas’ ya Ella Langley ari yo yakagombye kwegukana iki gihembo.
Iyi ndirimbo yagaragajwe nk’imwe mu zakunzwe cyane, ndetse igaragaza uburyo injyana ya Country ishobora kongera kugira ijambo rikomeye muri ibihembo bya Grammy.
Mu myaka 15 ishize, indirimbo ya Country yari iheruka kwegukana ibihembo bya Record of the Year na Song of the Year ni ‘Need You Now’ ya Lady A, yegukanye ibihembo byombi.
Ella Langley ashobora rero guhabwa amahirwe yo guhindura amateka, mu gihe indirimbo ye yaba iri mu zizahatanira iki gihembo kandi ikaza kucyegukana.
Olivia Rodrigo, Taylor Swift na Raye na bo barimo
Olivia Rodrigo na we ari mu bahabwa amahirwe yo guhatana, cyane cyane binyuze mu ndirimbo ye ‘The Cure’. Taylor Swift na we ashobora kugaragara kuri uru rutonde binyuze mu ndirimbo ‘The Fate of Ophelia’.
Raye, uzwi mu ndirimbo ‘Where Is My Husband!’, na we ari mu bashobora guhatana, mu gihe Bruno Mars ashobora kwitabira iki cyiciro binyuze mu ndirimbo ‘I Just Might’.
Don Toliver we agaragazwa nk’umuhanzi ushobora gutungura benshi, mu gihe Brandi Carlile na we akomeje kuba mu bahabwa amahirwe yo guhatanira ibihembo bikomeye, nubwo indirimbo ye ‘Returning to Myself’ itagize ingaruka zikomeye ku masoko y’umuziki nk’izindi ndirimbo ziri muri iri rushanwa.
Abazahatana bazamenyekana mu Gushyingo
Nk’uko Rolling Stone yabitangaje, abakandida bazahatanira ibihembo bya Grammy Awards 2027 bazatangazwa ku wa 16 Ugushyingo.
Nubwo abasesenguzi batanga amahirwe ku bahanzi batandukanye, ibisubizo nyakuri bizaterwa n’abatoranya abazahatanira ibihembo ndetse n’abazatorwa ku munsi w’itangwa ryabyo.
Biteganyijwe ko iki cyiciro kizagaragaramo ihangana rikomeye, cyane cyane hagati y’abahanzi b’abagore bakomeje kwigaragaza mu muziki mpuzamahanga.