Abafana batashye bamwirahira! Indirimbo 14 zasize ijoro rya King James ritazibagirana

Ibyo ni byo byabaye mu gitaramo cya King James cyo kwizihiza imyaka 20 amaze mu muziki, cyabereye muri BK Arena, aho yamaze amasaha arenga ane asusurutsa abakunzi be mu rugendo rwanyuze mu mateka y'indirimbo zubatse izina rye kuva mu 2006 kugeza ku bihangano aheruka gushyira hanze.

Mu ijoro ryose, yaririmbye indirimbo nyinshi. Gusa hari izabaye izidasanzwe, izatumye abantu bahaguruka icyarimwe, baririmba ijambo ku rindi, babyina batitaye ku masaha, kugeza ubwo BK Arena yose yahindutse nk'ikorali imwe y'abakunzi b'umuziki.

1."Yaciye Ibintu" yatangije umuriro w'igitaramo

Ku isaha ya saa tatu n'iminota 20' z'ijoro (21:20'), King James yatangiye kuririmba "Yaciye Ibintu", indirimbo yahise ihindura isura y'igitaramo.

Abantu bahagurutse mu myanya yabo, batangira kubyina no kuririmbana na we. Byari nk'ikimenyetso cy'uko iri joro ritari busige umuntu yicaye.

2."Naramukundaga" yasubije benshi mu bihe byabo

Saa tatu n'iminota 45' (21:45'), yumvikanye inanga za "Naramukundaga", imwe mu ndirimbo zikunzwe cyane mu rugendo rwa King James.

Mbere y'uko aririmba igitero cya mbere, abafana bari bamaze gufata ijambo. Amajwi yabo yasumbaga ay'umuziki, bamwe bafunze amaso, abandi baririmbana na we nk'abibuka inkuru z'urukundo banyuzemo.

3."Ndagukunda" yahuje imitima y'abakundana

Ku isaha ya saa tatu n'iminota 57' (21:57'), yakurikiyeho "Ndagukunda". Abakundanaga bayiririmbanye bahoberanye, abandi bayicanishamo amatara ya telefone. Byari bigoye kubona umuntu utari kumwenyura cyangwa utari kuririmba.

4."Abubu" yazamuye ubushyuhe bw'igice cya kabiri

King James agarutse ku rubyiniro mu gice cya kabiri cy'igitaramo, yahereye kuri "Abubu". Ako kanya BK Arena yongeye gusubirana imbaraga. Abafana bongera guhaguruka, ibyishimo bisubira ku rwego rwo hejuru.

5."Yebabawe" yakurikiwe n'impundu zidasanzwe

Ku isaha ya saa tanu n'iminota itandatu (23:06), yaririmbye "Yebabawe", yakirwa n'impundu nyinshi. Byari bigaragara ko iyi ndirimbo ikiri mu zifite umwanya ukomeye mu mitima y'abafana, bayibyina kandi bayiririmbana kuva ku ntangiriro kugeza ku musozo.

6."Umugati" ntiwaretse umurindi ugabanuka

Nyuma y'uko Mico The Best asoje igice cye, King James yakomeje umurindi binyuze mu ndirimbo "Umugati". Nta mwanya wo kuruhuka wari uhari. Abantu bakomeje kubyina no kuririmba, urubyiniro rukomeza kugumana umuriro.

7."Bagupfusha Ubusa" yerekanye uburemere bw'amagambo yayo

Ku isaha ya saa Satanu n'iminota 19 (23:19), yumvikanye "Bagupfusha Ubusa". Abafana bayiririmbye ijambo ku rindi, ibintu byagaragaje uburyo iyi ndirimbo imaze imyaka myinshi iba mu buzima bwabo.

8."Nturare Utabivuze" yazamuye amarangamutima

Nyuma y'iminota mike, King James yaririmbye "Nturare Utabivuze". Ni imwe mu ndirimbo zakorakoye cyane abakunzi b'indirimbo z'urukundo, aho benshi bayiririmbanaga amarangamutima agaragara ku maso.

9."Yantumye" yakomeje urujya n'uruza rw'ibyishimo

Ku isaha ya saa Tanu n'iminota 28 (23:28), hakurikiyeho "Yantumye". Nubwo amasaha yagendaga akura, imbaraga z'abari muri BK Arena zo zari zikomeza kwiyongera. Kubyina no kuririmba byakomeje nta n'umwe ucogora.

10."Ibare" yagaruye amateka y'urugendo rwa King James

Mu gice cyo gusoza, "Ibare" yibukije benshi imyaka myinshi bamaze bakurikira King James. Ni imwe mu ndirimbo zigaragaza neza urugendo rwe n'uburyo yagumye mu mitima y'abakunzi b'umuziki.

11."Ganyobwe" yahurije BK Arena mu ijwi rimwe

Mu gihe yatangizaga "Ganyobwe", byari nk'aho umuhanzi yahaye abafana mikoro. BK Arena yose yayiririmbye mu ijwi rimwe, ibintu byagaragaje uburyo iyi ndirimbo yabaye igice cy'ubuzima bwa benshi.

12."Umuriro Watse" ntiwasize umuntu yicaye

Ubwo yaririmbaga "Umuriri Watse", urubyiniro rwari rumaze gufata indi ntera. Abantu bakomeje kubyina, abandi bazunguza amaboko, ibyishimo bikomeza kwiyongera.

13."Buhoro Buhoro" yerekanye ko amasaha atari ikibazo

Nubwo isaha yari imaze kurenga saa sita z'ijoro, "Buhoro Buhoro" yagaragaje ko nta n'umwe wari ufite gahunda yo gutaha. Abafana bakomeje kuririmba no kubyina nk'aho igitaramo cyari kikigera hagati.

14."Ndagutegereje Cyane" yasoreje ku rwego rwo hejuru

Mu ndirimbo ya nyuma, "Ndagutegereje Cyane", BK Arena yose yahagurutse icyarimwe. Amatara ya telefone yazamutse mu kirere, amajwi y'abafana yuzura inyubako yose, abantu baririmbaga buri jambo, ibintu byasize benshi bafite amarangamutima adasanzwe.

BK Arena yabaye korali imwe

Abantu ntibatashye bavuga gusa ko babonye igitaramo cyiza.

Batashye bavuga uburyo bongereye kwibuka indirimbo zabaherekeje mu bihe bitandukanye by'ubuzima bwabo. Hari abibutse urukundo rwabo rwa mbere, abandi bibuka ubusore bwabo, abandi bishimira ko indirimbo bakuriyeho zigifite ubuzima nk'ubwo nyuma y'imyaka myinshi.

Iri joro ryagaragaje ikintu kimwe gikomeye: imyaka 20 ya King James mu muziki si imibare gusa, ahubwo ni imyaka 20 y'indirimbo zabaye amajwi y'ubuzima bw'Abanyarwanda benshi.

Iyo ni yo mpamvu, nyuma y'amasaha arenga ane y'umuziki, impundu n'amarangamutima, benshi batashye bamwirahira, bavuga ko iki gitaramo kizahora kiri mu byanditswe mu mateka y'umuziki nyarwanda.

Mu rugendo rwamaze amasaha arenga ane, King James yanyuze mu ndirimbo zagiye zimubakira izina kuva yinjira mu muziki mu 2006 kugeza ku bihangano bye biheruka. Buri ndirimbo yazanaga amarangamutima yayo, ariko hari izatumye BK Arena yose ihaguruka, abafana bayiririmba ijambo ku rindi.

Mu ndirimbo zirenga 40 yaririmbye mu gitaramo cye, indirimbo 14 zatanze ibyishimo bitazibagirana mu mitima y'abafana be

King James yahuriye ku rubyiniro n'abahanzi banyuranye barimo Ariel Wayz baririmbanye indirimbo 'Ndagukumbuye'