Mu mukino Real Madrid yatsinzemo Real Oviedo ibitego 2-0 kuri Stade Santiago Bernabeu kuri uyu wa Kane, hagaragaye umwuka mubi hagati y’abafana n’ubuyobozi bw’iyi kipe, aho bamwe mu bafana bagaragaje uburakari bukomeye kuri Perezida w’iyi kipe, Florentino Perez.
Mbere no mu gihe cy’umukino, abafana bazamuye ibitambaro binenga Perez, harimo ibyari byanditseho amagambo agira ati “Florentino, vete ya” bivuze ngo “Florentino, genda”, ndetse n’ikindi cyagiraga kiti “Florentino, culpable” bisobanura ngo “Florentino ni we nyirabayazana”. Ibi byapa byaje gukurwaho n’abashinzwe umutekano wa stade hagati mu mukino.
Mu mashusho yakwirakwijwe ku mbuga nkoranyambaga, Perez yanagaragaye asa n’uri guterana amagambo n’abafana bari bicaye hafi y’aho abayobozi bicara muri stade.
Uretse Perez, abakinnyi bakomeye ba Real Madrid nabo ntiborohewe n’abafana babo. Vinicius Junior wari wanambaye igitambaro cya kapiteni muri uwo mukino, yagiye avugirizwa induru buri uko yakoraga ku mupira.
Ni na ko byagenze kuri Kylian Mbappe watangiriye ku ntebe y’abasimbura. Izina rye ryagarutsweho n'amajwi menshi yuzuyemo urwango mbere y’umukino, ndetse ubwo yinjiraga mu kibuga mu gice cya kabiri abafana bongera kumuvugiriza induru.
Nyuma y’umukino, Mbappe yavuze ko kuri uyu mukino yagomabaga gutangira mu kibuga ariko umutoza Alvaro Arbeloa akamubwira ko ari “rutahizamu wa kane” mu ikipe.
Yagize ati: “Umutoza yambwiye ko kuri we ndi rutahizamu wa kane. Nabyakiriye kandi ngomba kubyubaha. Sinshobora kurakarira umutoza kuko ni icyemezo cye.”
Mbappe yanavuze ku nduru yavuzirizwaga n’abafana ati: “Ibyo ni ibisanzwe mu mupira w’amaguru. Iyo ikipe ititwaye neza, abafana bagaragaza amarangamutima yabo.”
Nubwo uyu mukinnyi yavuze gutya ariko Arbeloa yahakanye ibyo Mbappe yavuze, asobanura ko nta na rimwe yamubwiye ko ari rutahizamu wa kane.
Muri uyu mukino, ibitego bya Real Madrid byatsinzwe na Gonzalo Garcia na Jude Bellingham.
Nubwo Real Madrid yegukanye amanota atatu, iracyari inyuma cyane ya FC Barcelona yamaze kwegukana igikombe cya shampiyona ya Espagne. Real Madrid ifite amanota 80, irushwa amanota 11 na Barcelona mu gihe hasigaye imikino ibiri ngo shampiyona irangire.
Ibyapa byamagana Perezida wa Real Madrid, Florentino Perez