Raporo ya Bloomberg igaragaza ko ibigo bikomeye bikora inzoga byatakaje agaciro k’isoko kangana na miliyari zisaga 830 z’amadolari ya Amerika mu myaka ine ishize, ibintu abasesenguzi bahuza n’impinduka mu myitwarire y’abaguzi, cyane cyane urubyiruko.
Mu nkuru yasohowe na Bloomberg, hagaragajwe ko ibigo bikomeye bikora inzoga birimo abakora byeri, divayi n’ibindi binyobwa bisembuye byagabanije agaciro ku masoko y’imari kuva mu mwaka wa 2021.
Nubwo impamvu zitandukanye zirimo izamuka ry’ibiciro by’ubuzima n’ubukungu bwifashe nabi mu bice bimwe by’Isi zagaragajwe, impinduka mu buryo Gen Z ifata kunywa inzoga na zo ziri mu byagarutsweho cyane.
Gen Z, igizwe ahanini n’abavutse hagati ya 1997 na 2012, ikomeje kugaragaza imyitwarire itandukanye n’iyaranze ibisekuru byayibanjirije. Ubushakashatsi butandukanye bwerekana ko benshi muri bo bahitamo kugabanya cyangwa kureka kunywa inzoga, bashyira imbere ubuzima bwiza, siporo ndetse no kwirinda ingaruka ziterwa n’ibinyobwa bisembuye.
Bloomberg ivuga ko iri hinduka ryatumye inganda z’inzoga zitangira gushora imari nyinshi mu gukora ibinyobwa bitarimo inzoga cyangwa bifite inzoga nke, mu rwego rwo gukomeza kugera ku rubyiruko ruri kugenda ruhindura ibyo rwifuza ku isoko.
Abahanga mu bukungu bavuga ko bitaba ari ukuri kuvuga ko Gen Z ari yo yonyine yateje igabanuka ry’agaciro k’izi nganda, ariko bemeranya ko uru rubyiruko ruri mu byihutisha impinduka zikomeye muri uru ruganda rwari rumaze imyaka myinshi rufatwa nk’imwe mu nkingi z’ubukungu bw’imyidagaduro ku Isi.
Mu gihe ibigo bikora inzoga bikomeje gushaka uburyo bushya bwo gukurura abakiliya, biragaragara ko Gen Z iri guhindura amategeko y’isoko. Raporo ya Bloomberg igaragaza ko inganda z’inzoga zitagihanganye gusa n’ubukungu cyangwa ihangana ry’amasosiyete, ahubwo ziri no guhangana n’ihinduka ry’imyumvire n’imibereho ya ba gen-z.