Uyu muzamu w’imyaka 27 y’amavuko ukinira ikipe y’igihugu y’u Bwongereza yakoze ibitangaza mu mwaka ushize w’imikino muri Premier League aho yakuyemo imipira 125. Ramsdale asanzwe aziranye n’umutoza wa Newcastle, Eddie Howe kuko bakoranye muri Bournemouth.
Howe yagize ati: “Aaron ni umuzamu udasanzwe... Kubera ko twigeze gukorana mbere, nzi neza ibyo azatuzanira haba mu kibuga no hanze yacyo, bityo dutegereje kumwakira mu ikipe yacu.”
Newcastle yarangije ku mwanya wa gatanu umwaka ushize, bityo ibona itike yo gukina Champions League. Iyi kipe izatangira shampiyona ya Premier League ku itariki ya 16 Kanama ubwo izaba yasuye Aston Villa.
Ramsdale yerekeje muri Southampton avuye muri Arsenal umwaka ushize, agirana na yo amasezerano kugeza muri Kamena 2028.
Yari yageze muri Arsenal muri 2021 avuye muri Sheffield United, akaba yarabaye umuzamu wa mbere mu gihe cy’imyaka ibiri, anafasha Arsenal kurangiza ku mwanya wa kabiri muri Premier League mu mwaka w’imikino wa 2022-2023.
Nyuma yo kutabona umwanya kubera ko Arsenal yamuguriyeho David Raya, Ramsdale yaje kugenda. Southampton yari yarazamutse mu Cyiciro cya Mbere, ariko yahise isubira mu cya kabiri umwaka ushize, bituma Ramsdale yongera kumanuka ku nshuro ya gatatu, nyuma yo kubigeraho na Bournemouth mu 2019-2020 no muri Sheffield United mu 2020-2021.