Aya makipe yombi yinjiye muri Shampiyona y'u Rwanda mu mwaka w'imikino wa 2025/26 nyuma y'uko Sudani ikomeje guhura n'ibibazo by'umutekano byatumye ibikorwa bya siporo bihungabana muri icyo gihugu.
Kuba yarakiniye mu Rwanda byabaye inyungu ikomeye kuri BK Pro League kuko yazanye ihangana rikomeye, ubunararibonye mpuzamahanga ndetse n'ubwitabire bw'abafana.
Mu kiganiro yagiranye na InyaRwanda, Jules Karangwa yavuze ko ibiganiro hagati ya Rwanda Premier League n'ayo makipe bigeze ahashimishije ndetse ko impande zombi zifuza gukomeza ubufatanye.
Yagize ati: "Dukurikije aho ibiganiro bigeze, amahirwe ni menshi ko Al Hilal na Al Merrikh yakina hano mu mwaka w'imikino utaha. Bafite ubushake kandi bishimiye u Rwanda. Aya makipe yamaze no kutumenyesha ko imikino Nyafurika yayo azayikinira muri Stade Amahoro kuko babonye ubufasha bw'abafana benshi baza kuyashyigikira."
Nubwo bimeze gutyo, Karangwa yavuze ko icyemezo cya nyuma kitazafatwa n'ayo makipe cyangwa Rwanda Premier League yonyine, ahubwo ko kizaterwa n'ibiganiro bizakomeza hagati y'ayo makipe n'Ishyirahamwe ry'Umupira w'Amaguru muri Sudani rishaka kongera gusubukura shampiyona y'imbere mu gihugu.
Yagize ati: "Iyo biza kuba biri mu biganza byabo natwe, nari kukubwira ko 100% zizahaguma ariko Federasiyo yo muri Sudani irifuza gusubukura shampiyona nubwo aya makipe yavuze ko yo atiteguye. Nkurikije aho ibiganiro bigeze ubu, ku kigero cya 90% aya makipe azaguma mu Rwanda."
Hari icyo Al Hilal na Al Merrikh zafashije Ruhago y'u Rwanda?
Mu mwaka ushize w'imikino, Al Hilal na Al Merrikh zagize uruhare rukomeye mu kuzamura urwego rw'umupira w'amaguru mu Rwanda. Aya makipe yombi afite amateka akomeye muri Afurika ndetse yitabira amarushanwa mpuzamahanga ya CAF buri mwaka.
Kuba yarakinaga muri BK Pro League byatumye abakinnyi b'amakipe y'u Rwanda babona amahirwe yo guhangana n'amakipe afite ubunararibonye bwo ku rwego rwo hejuru, ibintu byafashije kuzamura ihangana ndetse n'ireme ry'imikino.
Yanagize uruhare mu kongera abakurikira shampiyona, haba ku bibuga no mu itangazamakuru, ndetse afasha no kumenyekanisha BK Pro League ku rwego mpuzamahanga.
Kuri ubu Al Hilal Omdurman na Al Merrikh bari muri Sudani aho bakomeje gukina imikino ya kamarampaka izatanga amakipe ane azahagararira icyo gihugu mu marushanwa ya CAF Champions League na CAF Confederation Cup mu mwaka utaha.
Mu gihe ibiganiro biri kuba byatanga umusaruro, aya makipe ashobora kongera kugaragara muri BK Pro League mu mwaka w'imikino wa 2026/27, ibintu byakomeza gutanga umusanzu ukomeye mu iterambere ry'umupira w'amaguru mu Rwanda.
Al Hilal Omdurman irifuza gukomeza gukina BK Pro League
AL Merrikh yabaye iya Gatatu muri BK Pro League 2025/26 yanyuzwe n'urwego rwa Shampiyona y'u Rwanda ndetse irifuza gukomeza gukina muri BK Pro League