Curtis Jackson umuraperi w'icyamamare akaba n'umukinnyi wa filime afatanya n'ishoramari, wamamaye ku izina rya 50 Cent, ni umwe mubahanzi badatinya guhangana ku mugaragaro na bagenzi babo ndetse ni kenshi akunze gukoresha imbuga nkoranyambaga yibasira bagenzi be.
Bisanzwe bizwi kandi ko 50 Cent hamwe n'umuhanzikazi w'icyamamare Madonna benshi bita umwamikazi w'injyana ya Pop, aba bombi ntibaca uwaka kuva kera. Ni kenshi uyu muraperi yakunze kumwibasira agaruka ku miterere ye. Kuri iyi nshuro 50 Cent yakoresheje Instagram ye maze agereranya imiterere ya Madonna n'iy'uruyuki (Bee).
50 Cent yagereranije imiterere ya Madonna niy'uruyuki bitangaza benshi
Akoresheje ifoto ya Madonna ari ku rubyiniro yayegeranije n'ifoto y'uruyuki mu rwego rwo kwerekana ko uyu muhanzikazi ateye nk'uruyuki bitewe n'uburyo inyuma ye (Amabuno) hamaze. Iyi miterere ya Madonna w'imyaka 65 ikunze kugarukwaho cyane yayigize kuva mu 2019 nyuma yo kwihinduza imiterere (Plastic Surgery) maze bikarangira abaganga bangije inyuma he.
Ifoto 50 Cent yakoresheje ya Madonna ashaka kwerekana ko ateye nk'uruyuki
Ibi nibyo byatumye 50 Cent yandika ati: ''Ninde wakoze ibi? Ni umukire (Madonna) kuki atigeze asubirayo ngo babikosore?Aka kanya nkeneye izina ry'umudogiteri wamukoze ibi!'' Aya magambo yayanditse ku ifoto ya Madonna yegeranye n'uruyuki ashaka kwerekana ko abakoze imiterere y'uyu muhanzikazi babikoze nabi.
Ntibyatinze iyi foto ya 50 Cent yakwirakwiriye hosa ku mbuga nkoranyambaga benshi bayiteraho urwenya ndetse no mu binyamakuru by'imyidagaduro bayigarukaho. Ikinyamakuru TMZ cyasohoye inkuru ivuga ko 50 Cent yagereranije imiterere ya Madonna niy'uruyuki maze bituma uyu muraperi asubiza iki kinyamakuru.
50 Cent yavuze ko TMZ yakoze iyi nkuru isa nkiyirengagije ko itabona Madonna iyo ari ku rubyiniro
50 Cent yongeye gukoresha Instagram ye maze asangiza abamukurikira inkuru TMZ yamwanditseho agira ati: ''Ubu TMZ iri kwigira nkaho itamubona (Madonna) ku rubyiniro asa nk'aho yinereye. Nishima mu mutwe buri uko mbonye BBL (Brazilian Butt Lift ubwoko bwa Surgery Madonna yakoresheje) mbi. Ese inshuti z'umuntu zibahe iyo azikeneye? Ni umukire yabihinduza rero nabihinduze''.
50 Cent avuga ko Madonna ari umukire akwiye guhinduza iyi miterere ye
Iyi si inshuro ya mbere 50 Cent yibasira Madonna ku mbuga nkoranyambaga dore ko mu 2021 bigeze gukozanyaho ubwo uyu muraperi yamunengaga ko yiyambika nk'inkumi nyamara ari umukecuru. Ibi byatumye Madonna amwibasira amusaba kutazajya agira icyo avuga ku gitsinagore.
Imiterere y'amabuno ya Madonna ikunze kuvugisha benshi barimo na 50 Cent