Ni mu mukino wo ku munsi wa 33 wakinwe kuri iki Cyumweru saa Kumi n'imwe n’iminota 30 kuri Etihad Stadium. Manchester City yatangiye umukino yotsa igitutu ku izamu rya Arsenal nderse ku munota wa 4 ihita irata igitego cyabazwe ku ishoti ryari rirekuwe na Rayan Cherki, ubundi Gabriell Magalhaes arikoraho umupira uragenda ukubita igiti cy’izamu uvamo.
Arsenal nayo yaje kwinjira mu mukino ndetse ikanyuzamo ikagera imbere y’izamu ariko ku munota wa 16 Rayan Cherki n’ubundi afungura amazamu ku mupira yahawe na Matheus Nunes.
Ku mukora wa 18 umunyezamu wa Manchester City, Gianluigi Donnarumma yakoze amakosa atinda gutera umupira, Kai Havertz ahita amugeraho, arekuye ishoti rikubita ku kirenge cye rijya mu nshundura, Arsenal iba ibonye igitego cyo kwishyura gutyo.
Manchester City yakomeje kurusha Arsenal ariko ba myugariro bayo bakihagararaho ubundi igice cya mbere kirangira ari 1-1.
Mu gice cya kabiri Arsenal yaje ikora impinduka mu kibuga havamo Noni Madueke hajyamo Gabriel Martinelli. Arsenal nubwo yakoze izi mpinduka n’ubundi yakomeje kurushwa ba Manchester City. Ku munota wa 52 Erling Haaland yashoboraga gutsinda igitego cya kabiri ku buryo bwiza yari abonye imbere y’izamu ariko arekuye ishoti rinyura ku ruhande.
Hari aho Arsenal yarase ibitego bibiri byikurikiranya. Gabriell Martinelli yarekuye ishoti ari imbere y’izamu ba myugariro barikuraho ndetse na Eberech Eze arekura ishoti ariko rikubita igiti cy’izamu.
Ku munota wa 65, Erling Haaland yatsinze igitego cya kabiri. Nyuma yo gutsindwa igitego cya kabiri, Arsenal yagerageje gushaka uko yishyura ndetse hazamo uguhangana cyane hagati ya Gabriel Magalhaes na Haaland.
Hari aho Kai Havertz yahawe umupira mwiza ubundi ashyiraho umutwe ariko umupira unyura hejuru y’izamu gato cyane. Umukino warangiye Manchester City ibitego 2-1.
Kugeza ubu Manchester City igifite umukino w’ikirarane irarushwa na Arsenal amanota atatu gusa.
Bivuze ko iyi kipe itozwa na Pep Guardiola nitsinda imikino itanu isigaye ngo shampiyona irangire kongeraho n’iki kirarane na Arsenal ikazaba yaratsinze imikino itanu isigaye hazahita harebwa uzigamye ibitego byinshi agahabwa igikombe.
Kugeza ubu Arsenal izigamye ibitego 37 mu gihe Manchester City yo izigamye ibitego 36.
Erling Haaland yishimira igitego yatsinze
Manchester City yatsinze Arsenal ibitego 2-1