Izi mbwa z’ingabo, zari zifite imyaka itatu, zatangiye urugendo ku wa 6 Kanama 2025, zivuye mu itsinda rya Mayukuyuku. Scott Creel, umwarimu muri Kaminuza ya Leta ya Montana muri Leta Zunze Ubumwe za Amerika, yakurikiranye urugendo rwazo akoresheje utwuma twa GPS zari zambitswe.
Creel yavuze ko byari bitangaje kubona intera izi mbwa zashoboye kugenda. Yanasobanuye ko iyo zitabonye amahirwe yo kororoka mu matsinda ari hafi yazo, zishobora kugenda zishakisha ahandi.
Hagati muri Nzeri 2025, izi mbwa zongeye guhura na bashiki bazo, zimaze gukora urugendo rw’ibilometero hafi 1.200.
Nyuma zakomeje urugendo zigana mu kibaya cya Luangwa mu burasirazuba bwa Zambia. Abashakashatsi bakeka ko zaba zarahuriye n’ingore muri ako gace, ariko ntibiramenyekana neza.
Urugendo ruzifasha gukomeza kubaho
Ubushakashatsi bwakozwe mu gihe cy’imyaka 16 ku mbwa zo mu gasozi zirenga 500 ziri mu matsinda arenga 50 bwagaragaje ko ingendo nk’izi zifasha guhuza amatsinda y’inyamaswa aba mu duce dutandukanye.
Izo ngendo zishobora gufasha izi mbwa kororoka no kongera umubare wazo. Zifasha kandi guhuza amatsinda yo muri pariki zirindwi zo muri Zambia n’andi yo muri Mozambique, Repubulika Iharanira Demokarasi ya Congo na Malawi.
Creel yagize ati: “Zizongera kwiyongera ari uko amatsinda yazo akomeje guhuzwa.”
Imitego y’insinga ni imwe mu mbogamizi zikomeye
Nubwo izi mbwa zakoze urugendo rudasanzwe, imitego y’insinga ikomeje gushyira ubuzima bwazo mu kaga. Iyi mitego ikoreshwa n’abashimusi bashaka inyama z’inyamaswa zo mu gasozi, ariko ishobora no gufata izindi zitari zo bagambiriye.
Muri bashiki b’izi mbwa, imwe yafatiwe mu mutego w’insinga, mu gihe indi yaje kuburirwa irengero.
Abashakashatsi bakeka ko ishobora kuba yarishwe, nyuma yo kubona ko akuma ka GPS yari yambitswe kakozweho igikorwa cyo kukavanaho. Ibyabaye ku yindi yari isigaye ntibizwi.
Creel yagize ati: “Nitudakemura iki kibazo, nta nyamaswa tuzaba tugisigaranye zo kurengera.”
Yasobanuye ko kurwanya ubu bushimusi bidakwiye kugarukira ku guhana ababukora, ahubwo ko hakenewe no gushakira ibisubizo ubukene butuma bamwe biyambaza guhiga inyamaswa mu buryo bunyuranyije n’amategeko.
Yagize ati: “Abantu ntibashyira imitego kuko ari umukino ubashimisha. Babiterwa n’uko ari abakene baba mu duce twa kure, badafite ubundi buryo bwinshi bwo kubona imibereho.
Ni yo mpamvu hakenewe no gushaka uburyo abantu batakenera kubikora.”Ikindi kibazo ni igabanuka ry’inyamaswa izi mbwa zihiga kugira ngo zibone ibiryo. Iyo izo nyamaswa zibuze, izi mbwa zigenda intera ndende zishakisha ibyo kurya, bikazongera ibyago byo kugwa mu mitego.
Ziri mu nyamaswa zugarijwe no kuzimira
Ishyirahamwe Mpuzamahanga rishinzwe Kubungabunga Ibidukikije (IUCN) rigaragaza ko ku isi hasigaye amatsinda atageze kuri 700 y’imbwa zo mu gasozi zo muri Afurika, n’inyamaswa zikuze zitageze ku 1.700.
Creel yavuze ko kurinda izi nyamaswa ari inshingano ikomeye, kuko abantu basangiye isi n’ibindi binyabuzima byinshi.
Yagize ati: “Turi abantu miliyari 8,3, ariko dusangiye isi n’ibindi binyabuzima bigera hafi kuri miliyoni umunani. 
Imbwa eshatu zakoze urugendo rw’ibilometero birenga 4.000 zishaka izo zororokana na zo