Ni mu mukino wa 1/8 wakinwe kuri iki Cyumweru saa Yine kuri MetLife Stadium muri Amerika.
Ikipe y’igihugu ya Norway yatangiye iri hejuru isatira cyane ndetse mu minota ya mbere Alexander Sorloth yari yafunguye amazamu ariko asifurwa kurarira.
Nyuma yaho Brazil nayo yinjiye mu mukino itangira no kugera imbere y’izamu ubundi ku munota wa 14 iba ibonye penariti ku ikosa Kristoffer Ajer yari akoreye Matheus Cunha.
Iyi penariti yari igiye guterwa na Vinicius gusa ayiha Bruno Guimaraes ayiteye umunyezamu ayikuramo.
Amakipe yombi yakomeje gusatira nkaho ku ruhande rwa Norway hari aho Martin Odegaard yarekuye ishoti rinyura impande y’izamu gato cyane naho ku ruhande rwa Brazil hakaba hari aho Vinicius yarekuye ishoti gusa umunyezamu wa Norway aratabara.
Ku munota wa 44 Allison Backer yatabaye Brazil ku ishoti ryari rirekuwe na Martin Odegaard gusa arikuramo. Igice cya mbere cyarangiye amakipe yombi anganya 0-0.
Mu gice cya kabiri uku gukubana kwakomeje ubundi ku munota wa 79 Erling Haaland afungura amazamu ku mupira yari ahawe na Andreas Schjelderup.
Brazil yashatse uko yishyura ndetse ukabona uburyo ariko umunyezamu wa Norway akaba ibamba. Ku wa 90 Erling Haaland yatsinze igitego cya kabiri nabwo ahawe umupira na Andreas Schjelderup.
Mbere y’uko umukino urangira ku munota wa 90+10 Brazil yabonye penariti yinjizwa na Neymar ubundi umukino urangira Norway itsinze Brazil ibitego 2-1 ihita yerekeza muri 1/4 cy’igikombe cy’Isi cya 2026.
Brazil ifite ibikombe by'Isi bitanu yasezerewe na Norway irimo iragikina ku Nshuro ya 4.
Haaland yafashije Norway gusezerera Brazil
Byari agahinda ku bakinnyi ba Brazil nyuma yo gusezererwa
Yari amarira kuri Neymar bishoboka ko yarimo arakina igikombe cye cy'Isi cya nyuma